Lakshmi Stotram (Indra kritam)

ఇన్ద్రరచితలక్ష్మీస్తోత్రమ్


శ్రీగణేశాయ నమః |

ఓం నమః కమలవాసిన్యై నారాయణ్యై నమో నమః |
కృష్ణప్రియాయై సారాయై పద్మాయై చ నమో నమః || ౧||
పద్మపత్రేక్షణాయై చ పద్మాస్యాయై నమో నమః |
పద్మాసనాయై పద్మిన్యై వైష్ణవ్యై చ నమో నమః || ౨||
సర్వసమ్పత్స్వరూపాయై సర్వదాత్ర్యై నమో నమః |
సుఖదాయై మోక్షదాయై సిద్ధిదాయై నమో నమః || ౩||
హరిభక్తిప్రదాత్ర్యై చ హర్షదాత్ర్యై నమో నమః |
కృష్ణవక్షఃస్థితాయై చ కృష్ణేశాయై నమో నమః || ౪||
కృష్ణశోభాస్వరూపాయై రత్నపద్మే చ శోభనే |
సమ్పత్యధిష్ఠాతృదేవ్యై మహాదేవ్యై నమో నమః || ౫||
శన్యాధిష్ఠాదేవ్యై చ శస్యాయై చ నమో నమః |
నమో బుద్ధిస్వరూపాయై బుద్ధిదాయై నమో నమః || ౬||
వైకుణ్ఠే యా మహాలక్ష్మీర్లక్ష్మీః క్షీరోదసాగరే |
స్వర్గలక్ష్మీరిన్ద్రగేహే రాజలక్ష్మీర్నృపాలయే || ౭||
గృహలక్ష్మీశ్చ గృహిణాం గేహే చ గృహదేవతా |
సురభి సా గవాం మాతా దక్షిణా యజ్ఞకామనీ || ౮||
అదితిర్దేవమాతా త్వం కమలా కమలాలయే |
స్వాహా త్వం చ హవిర్దానే కవ్యదానే స్వధా స్మృతా || ౯||
త్వం హి విష్ణుస్వరూపా చ సర్వాధారా వసున్ధరా |
శుద్ధసత్వస్వరూపా త్వం నారాయణపరాయణా || ౧౦||
క్రోధహింసావర్జితా చ వరదా చ శుభాననా |
పరమార్థప్రదా త్వం చ హరిదాస్యప్రదా పరా || ౧౧||
యయా వినా జగత్ సర్వే భస్మీభూతమసారకమ్ |
జీవన్మృతం చ విశ్వం చ శవతుల్యం యయా వినా || ౧౨||
సర్వేషాం చ పరా త్వం హి సర్వబాన్ధవరూపిణీ |
యయా వినా న సమ్భాప్యో బాధ్వవైర్బాన్ధవః సదా || ౧౩||
త్వయా హీనో బన్ధుహీనస్త్వయా యుక్తః సబాన్ధవః |
ధర్మార్థకామమోక్షాణాం త్వం చ కారణరూపిణీ || ౧౪||
యథా మాతా స్తనన్ధానాం శిశూనాం శైశవే సదా |
తథా త్వం సర్వదా మాతా సర్వేషాం సర్వరూపతాః || ౧౫||
మాతృహీన స్నత్యక్తః స చేజ్జీవతి దైవతః |
త్వయా హీనో జనః కోపి న జీవత్యేవ నిశ్చితమ్ || ౧౬||
సుప్రసన్నస్వరూపా త్వం మాం ప్రసన్నా భవామ్బికే |
వైరిగ్రస్తం చ విషయం దేహి మహ్యం సనాతని || ౧౭||
వయం యావత్ త్వయా హీనా బన్ధుహీనశ్చ భిక్షుకాః |
సర్వసమ్పద్విహీనాశ్చ తావదేవ హరిప్రియే || ౧౮||
రాజ్యం దేహి శ్రియం దేహి బలం దేహి సురేశ్వరి |
కీర్తి దేహి ధనం దేహి యశో మహ్యం చ దేహి వై || ౧౯||
కామం దేహి మతిం దేహి భోగాన్ దేహి హరిప్రియే |
జ్ఞానం దేహి చ ధర్మే చ సర్వసౌభాగ్యమీప్సితమ్ || ౨౦||
ప్రభావాం చ ప్రతాపం చ సర్వాధికారమేవ చ |
జయం పరాక్రమం యుద్ధే పరమైశ్వర్యమైవ చ || ౨౧||
ఇత్యుక్త్వా చ మహేన్ద్రశ్చ సర్వైః సురగణైః సహ |
ప్రణమామ సాశ్రునేత్రో మూర్ధ్నా చైవ పునః పునః || ౨౨||
బ్రహ్మా చ శఙ్కరశ్చైవ శేషో ధర్మశ్చ కేశవః |
సర్వేచక్రుః పరిహారం సురార్థే చ పునః పునః || ౨౩||
దేవేభ్యశ్చ వరం దత్వా పుష్పమాలాం మనోహరామ్ |
కేశవాయ దదౌ లక్ష్మీః సన్తుష్టా సురసంసది || ౨౪||
యయుర్దైవాశ్చ సన్తుష్టాః స్వం స్వం స్థానంచ నారద |
దేవీ యయౌ హరేః క్రోడం దృష్టా క్షీరోదశాయినః || ౨౫||
యయతుశ్చైయ స్వగృహం బ్రహ్మేశానీ చ నారద |
దత్వా శుభాశిషం తౌ చ దేవేభ్యః ప్రీతిపూర్వకమ్ || ౨౬||

ఫలశృతిః
ఇదం స్తోత్రం మహాపుణ్యం త్రిసంధ్యం యః పఠేన్నరః |
కుబేరతుల్యః స భవేత్ రాజరాజేశ్వరో మహాన్ || ౨౭||
సిద్ధస్తోత్రం యది పఠేత్ సోపి కల్పతరూర్నరః |
పఞ్చలక్షజపేనైవ స్తోత్రసిద్ధిర్భవేన్నృణామ్ || ౨౮||
సిద్ధస్తోత్రం యది పఠేన్మాసమేకం చ సంయతః |
మహాసుఖీ చ రాజేన్ద్రో భవిష్యతి న సంశయః || ౨౯||

|| ఇతిశ్రీ ఇన్ద్రకృతం లక్ష్మీస్తోత్రమ్ సమ్పూర్ణమ్ ||

Sri Lakshmi ashtottara satanama Stotram

శ్రీ లక్ష్మీ అష్టోత్తరశతనామ స్తోత్రం

దేవ్యువాచ-
దేవదేవ మహాదేవ త్రికాలజ్ఞ మహేశ్వర |
కరుణాకర దేవేశ భక్తానుగ్రహకారక || ౧ ||
అష్టోత్తరశతం లక్ష్మ్యాః శ్రోతుమిచ్ఛామి తత్త్వతః |
ఈశ్వర ఉవాచ-
దేవి సాధు మహాభాగే మహాభాగ్యప్రదాయకమ్ |
సర్వైశ్వర్యకరం పుణ్యం సర్వపాపప్రణాశనమ్ || ౨ ||
సర్వదారిద్ర్యశమనం శ్రవణాద్భుక్తిముక్తిదమ్ |
రాజవశ్యకరం దివ్యం గుహ్యాద్గుహ్యతమం పరమ్ || ౩ ||
దుర్లభం సర్వదేవానాం చతుఃషష్టికళాస్పదమ్ |
పద్మాదీనాం వరాంతానాం విధీనాం నిత్యదాయకమ్ || ౪ ||
సమస్తదేవసంసేవ్యమణిమాద్యష్టసిద్ధిదమ్ |
కిమత్ర బహునోక్తేన దేవీ ప్రత్యక్షదాయకమ్ || ౫ ||
తవ ప్రీత్యాద్య వక్ష్యామి సమాహితమనాః శ్రృణు |
అష్టోత్తరశతస్యాస్య మహాలక్ష్మీస్తు దేవతా || ౬ ||
క్లీంబీజపదమిత్యుక్తం శక్తిస్తు భువనేశ్వరీ |
అంగన్యాసః కరన్యాస స ఇత్యాదిః ప్రకీర్తితః || ౭ ||
ధ్యానమ్
వందే పద్మకరాం ప్రసన్నవదనాం సౌభాగ్యదాం భాగ్యదాం
హస్తాభ్యామభయప్రదాం మణిగణైర్నానావిధైర్భూషితామ్ |
భక్తాభీష్టఫలప్రదాం హరిహరబ్రహ్మాదిభిః సేవితాం
పార్శ్వే పంకజశంఖపద్మనిధిభిర్యుక్తాం సదా శక్తిభిః || ౮ ||
సరసిజనయనే సరోజహస్తే ధవలతరాంశుకగంధమాల్యశోభే |
భగవతి హరివల్లభే మనోజ్ఞే త్రిభువనభూతికరి ప్రసీద మహ్యమ్ || ౯ ||
ప్రకృతిం వికృతిం విద్యాం సర్వభూతహితప్రదామ్ |
శ్రద్ధాం విభూతిం సురభిం నమామి పరమాత్మికామ్ || ౧౦ ||
వాచం పద్మాలయాం పద్మాం శుచిం స్వాహాం స్వధాం సుధామ్ |
ధన్యాం హిరణ్మయీం లక్ష్మీం నిత్యపుష్టాం విభావరీమ్ || ౧౧ ||
అదితిం చ దితిం దీప్తాం వసుధాం వసుధారిణీమ్ |
నమామి కమలాం కాంతాం కామాక్షీం క్రోధసంభవామ్ || ౧౨ ||
అనుగ్రహపదాం బుద్ధిమనఘాం హరివల్లభామ్ |
అశోకామమృతాం దీప్తాం లోకశోకవినాశినీమ్ || ౧౩ ||
నమామి ధర్మనిలయాం కరుణాం లోకమాతరమ్ |
పద్మప్రియాం పద్మహస్తాం పద్మాక్షీం పద్మసుందరీమ్ || ౧౪ ||
పద్మోద్భవాం పద్మముఖీం పద్మనాభప్రియాం రమాం |
పద్మమాలాధరాం దేవీం పద్మినీం పద్మగంధినీమ్ || ౧౫ ||
పుణ్యగంధాం సుప్రసన్నాం ప్రసాదాభిముఖీం ప్రభామ్ |
నమామి చంద్రవదనాం చంద్రాం చంద్రసహోదరీమ్ || ౧౬ ||
చతుర్భుజాం చంద్రరూపామిందిరామిందుశీతలామ్ |
ఆహ్లాదజననీం పుష్టిం శివాం శివకరీం సతీమ్ || ౧౭ ||
విమలాం విశ్వజననీం తుష్టిం దారిద్ర్యనాశినీమ్ |
ప్రీతిపుష్కరిణీం శాంతాం శుక్లమాల్యాంబరాం శ్రియమ్ || ౧౮ ||
భాస్కరీం బిల్వనిలయాం వరారోహాం యశస్వినీమ్ |
వసుంధరాముదారాంగీం హరిణీం హేమమాలినీమ్ || ౧౯ ||
ధనధాన్యకరీం సిద్ధిం స్రైణసౌమ్యాం శుభప్రదామ్ |
నృపవేశ్మగతానందాం వరలక్ష్మీం వసుప్రదామ్ || ౨౦ ||
శుభాం హిరణ్యప్రాకారాం సముద్రతనయాం జయామ్ |
నమామి మంగళాం దేవీం విష్ణువక్షఃస్థలస్థితామ్ || ౨౧ ||
విష్ణుపత్నీం ప్రసన్నాక్షీం నారాయణసమాశ్రితామ్ |
దారిద్ర్యధ్వంసినీం దేవీం సర్వోపద్రవవారిణీమ్ || ౨౨ ||
నవదుర్గాం మహాకాళీం బ్రహ్మవిష్ణుశివాత్మికామ్ |
త్రికాలజ్ఞానసంపన్నాం నమామి భువనేశ్వరీమ్ || ౨౩ ||
లక్ష్మీం క్షీరసముద్రరాజతనయాం శ్రీరంగధామేశ్వరీం
దాసీభూతసమస్తదేవవనితాం లోకైకదీపాంకురామ్ |
శ్రీమన్మందకటాక్షలబ్ధవిభవబ్రహ్మేంద్రగంగాధరాం త్వాం
త్రైలోక్యకుటుంబినీం సరసిజాం వందే ముకుందప్రియామ్ || ౨౪ ||
మాతర్నమామి కమలే కమలాయతాక్షి
శ్రీవిష్ణుహృత్కమలవాసిని విశ్వమాతః |
క్షీరోదజే కమలకోమలగర్భగౌరి
లక్ష్మీః ప్రసీద సతతం నమతాం శరణ్యే || ౨౫ ||
త్రికాలం యో జపేద్విద్వాన్ షణ్మాసం విజితేంద్రియః |
దారిద్ర్యధ్వంసనం కృత్వా సర్వమాప్నోత్యయత్నతః || ౨౬ ||
దేవీనామసహస్రేషు పుణ్యమష్టోత్తరం శతమ్ |
యేన శ్రియమవాప్నోతి కోటిజన్మదరిద్రతః || ౨౭ ||
భృగువారే శతం ధీమాన్ పఠేద్వత్సరమాత్రకమ్ |
అష్టైశ్వర్యమవాప్నోతి కుబేర ఇవ భూతలే || ౨౮ ||
దారిద్ర్యమోచనం నామ స్తోత్రమంబాపరం శతమ్ |
యేన శ్రియమవాప్నోతి కోటిజన్మదరిద్రితః || ౨౯ ||
భుక్త్వా తు విపులాన్ భోగానస్యాః సాయుజ్యమాప్నుయాత్ |
ప్రాతఃకాలే పఠేన్నిత్యం సర్వదుఃఖోపశాంతయే |
పఠంస్తు చింతయేద్దేవీం సర్వాభరణభూషితామ్ || ౩౦ ||

Shri Maha Lakshmi Sahasranaama Stotram

.. శ్రీ మహాలక్ష్మీ సహస్రనామ స్తోత్రమ్ ..


శ్రీః పద్మా ప్రకృతిః సత్త్వా శాన్తా చిచ్ఛక్తిరవ్యయా |
కేవలా నిష్కలా శుద్ధా వ్యాపినీ వ్యోమవిగ్రహా || ౧||
వ్యోమపద్మకృతాధారా పరా వ్యోమామృతోద్భవా |
నిర్వ్యోమా వ్యోమమధ్యస్థా పఞ్చవ్యోమపదాశ్రితా || ౨||
అచ్యుతా వ్యోమనిలయా పరమానన్దరూపిణీ |
నిత్యశుద్ధా నిత్యతృప్తా నిర్వికారా నిరీక్షణా || ౩||
జ్ఞానశక్తిః కర్తృశక్తిర్భోక్తృశక్తిః శిఖావహా |
స్నేహాభాసా నిరానన్దా విభూతిర్విమలాచలా || ౪||
అనన్తా వైష్ణవీ వ్యక్తా విశ్వానన్దా వికాసినీ |
శక్తిర్విభిన్నసర్వార్తిః సముద్రపరితోషిణీ || ౫||
మూర్తిః సనాతనీ హార్దీ నిస్తరఙ్గా నిరామయా |
జ్ఞానజ్ఞేయా జ్ఞానగమ్యా జ్ఞానజ్ఞేయవికాసినీ || ౬||
స్వచ్ఛన్దశక్తిర్గహనా నిష్కమ్పార్చిః సునిర్మలా |
స్వరూపా సర్వగా పారా బృంహిణీ సుగుణోర్జితా || ౭||
అకలఙ్కా నిరాధారా నిఃసంకల్పా నిరాశ్రయా |
అసంకీర్ణా సుశాన్తా చ శాశ్వతీ భాసురీ స్థిరా || ౮||
అనౌపమ్యా నిర్వికల్పా నియన్త్రీ యన్త్రవాహినీ |
అభేద్యా భేదినీ భిన్నా భారతీ వైఖరీ ఖగా || ౯||
అగ్రాహ్యా గ్రాహికా గూఢా గమ్భీరా విశ్వగోపినీ |
అనిర్దేశ్యా ప్రతిహతా నిర్బీజా పావనీ పరా || ౧౦||
అప్రతర్క్యా పరిమితా భవభ్రాన్తివినాశినీ |
ఏకా ద్విరూపా త్రివిధా అసంఖ్యాతా సురేశ్వరీ || ౧౧||
సుప్రతిష్ఠా మహాధాత్రీ స్థితిర్వృద్ధిర్ధ్రువా గతిః |
ఈశ్వరీ మహిమా ఋద్ధిః ప్రమోదా ఉజ్జ్వలోద్యమా || ౧౨||
అక్షయా వర్ద్ధమానా చ సుప్రకాశా విహఙ్గమా |
నీరజా జననీ నిత్యా జయా రోచిష్మతీ శుభా || ౧౩||
తపోనుదా చ జ్వాలా చ సుదీప్తిశ్చాంశుమాలినీ |
అప్రమేయా త్రిధా సూక్ష్మా పరా నిర్వాణదాయినీ || ౧౪||
అవదాతా సుశుద్ధా చ అమోఘాఖ్యా పరమ్పరా |
సంధానకీ శుద్ధవిద్యా సర్వభూతమహేశ్వరీ || ౧౫||
లక్ష్మీస్తుష్టిర్మహాధీరా శాన్తిరాపూరణానవా |
అనుగ్రహా శక్తిరాద్యా జగజ్జ్యేష్ఠా జగద్విధిః || ౧౬||
సత్యా ప్రహ్వా క్రియా యోగ్యా అపర్ణా హ్లాదినీ శివా |
సమ్పూర్ణాహ్లాదినీ శుద్ధా జ్యోతిష్మత్యమృతావహా || ౧౭||
రజోవత్యర్కప్రతిభాఽఽకర్షిణీ కర్షిణీ రసా |
పరా వసుమతీ దేవీ కాన్తిః శాన్తిర్మతిః కలా || ౧౮||
కలా కలఙ్కరహితా విశాలోద్దీపనీ రతిః |
సమ్బోధినీ హారిణీ చ ప్రభావా భవభూతిదా || ౧౯||
అమృతస్యన్దినీ జీవా జననీ ఖణ్డికా స్థిరా |
ధూమా కలావతీ పూర్ణా భాసురా సుమతీరసా || ౨౦||
శుద్ధా ధ్వనిః సృతిః సృష్టిర్వికృతిః కృష్టిరేవ చ |
ప్రాపణీ ప్రాణదా ప్రహ్వా విశ్వా పాణ్డురవాసినీ || ౨౧||
అవనిర్వజ్రనలికా చిత్రా బ్రహ్మాణ్డవాసినీ |
అనన్తరూపానన్తాత్మానన్తస్థానన్తసమ్భవా || ౨౨||
మహాశక్తిః ప్రాణశక్తిః ప్రాణదాత్రీ ఋతమ్భరా |
మహాసమూహా నిఖిలా ఇచ్ఛాధారా సుఖావహా || ౨౩||
ప్రత్యక్షలక్ష్మీర్నిష్కమ్పా ప్రరోహాబుద్ధిగోచరా |
నానాదేహా మహావర్తా బహుదేహవికాసినీ || ౨౪||
సహస్రాణీ ప్రధానా చ న్యాయవస్తుప్రకాశికా |
సర్వాభిలాషపూర్ణేచ్ఛా సర్వా సర్వార్థభాషిణీ || ౨౫||
నానాస్వరూపచిద్ధాత్రీ శబ్దపూర్వా పురాతనీ |
వ్యక్తావ్యక్తా జీవకేశా సర్వేచ్ఛాపరిపూరితా || ౨౬||
సంకల్పసిద్ధా సాంఖ్యేయా తత్త్వగర్భా ధరావహా |
భూతరూపా చిత్స్వరూపా త్రిగుణా గుణగర్వితా || ౨౭||
ప్రజాపతీశ్వరీ రౌద్రీ సర్వాధారా సుఖావహా |
కల్యాణవాహికా కల్యా కలికల్మషనాశినీ || ౨౮||
నీరూపోద్భిన్నసంతానా సుయన్త్రా త్రిగుణాలయా |
మహామాయా యోగమాయా మహాయోగేశ్వరీ ప్రియా || ౨౯||
మహాస్త్రీ విమలా కీర్తిర్జయా లక్ష్మీర్నిరఞ్జనా |
ప్రకృతిర్భగవన్మాయా శక్తిర్నిద్రా యశస్కరీ || ౩౦||
చిన్తా బుద్ధిర్యశః ప్రజ్ఞా శాన్తిః సుప్రీతివర్ద్ధినీ |
ప్రద్యుమ్నమాతా సాధ్వీ చ సుఖసౌభాగ్యసిద్ధిదా || ౩౧||
కాష్ఠా నిష్ఠా ప్రతిష్ఠా చ జ్యేష్ఠా శ్రేష్ఠా జయావహా |
సర్వాతిశాయినీ ప్రీతిర్విశ్వశక్తిర్మహాబలా || ౩౨||
వరిష్ఠా విజయా వీరా జయన్తీ విజయప్రదా |
హృద్గృహా గోపినీ గుహ్యా గణగన్ధర్వసేవితా || ౩౩||
యోగీశ్వరీ యోగమాయా యోగినీ యోగసిద్ధిదా |
మహాయోగేశ్వరవృతా యోగా యోగేశ్వరప్రియా || ౩౪||
బ్రహ్మేన్ద్రరుద్రనమితా సురాసురవరప్రదా |
త్రివర్త్మగా త్రిలోకస్థా త్రివిక్రమపదోద్భవా || ౩౫||
సుతారా తారిణీ తారా దుర్గా సంతారిణీ పరా |
సుతారిణీ తారయన్తీ భూరితారేశ్వరప్రభా || ౩౬||
గుహ్యవిద్యా యజ్ఞవిద్యా మహావిద్యా సుశోభితా |
అధ్యాత్మవిద్యా విఘ్నేశీ పద్మస్థా పరమేష్ఠినీ || ౩౭||
ఆన్వీక్షికీ త్రయీ వార్తా దణ్డనీతిర్నయాత్మికా |
గౌరీ వాగీశ్వరీ గోప్త్రీ గాయత్రీ కమలోద్భవా || ౩౮||
విశ్వమ్భరా విశ్వరూపా విశ్వమాతా వసుప్రదా |
సిద్ధిః స్వాహా స్వధా స్వస్తిః సుధా సర్వార్థసాధినీ || ౩౯||
ఇచ్ఛా సృష్టిర్ద్యుతిర్భూతిః కీర్తిః శ్రద్ధా దయామతిః |
శ్రుతిర్మేధా ధృతిర్హ్రీః శ్రీర్విద్యా విబుధవన్దితా || ౪౦||
అనసూయా ఘృణా నీతిర్నిర్వృతిః కామధుక్కరా |
ప్రతిజ్ఞా సంతతిర్భూతిర్ద్యౌః ప్రజ్ఞా విశ్వమానినీ || ౪౧||
స్మృతిర్వాగ్విశ్వజననీ పశ్యన్తీ మధ్యమా సమా |
సంధ్యా మేధా ప్రభా భీమా సర్వాకారా సరస్వతీ || ౪౨||
కాఙ్క్షా మాయా మహామాయా మోహినీ మాధవప్రియా |
సౌమ్యాభోగా మహాభోగా భోగినీ భోగదాయినీ || ౪౩||
సుధౌతకనకప్రఖ్యా సువర్ణకమలాసనా |
హిరణ్యగర్భా సుశ్రోణీ హారిణీ రమణీ రమా || ౪౪||
చన్ద్రా హిరణ్మయీ జ్యోత్స్నా రమ్యా శోభా శుభావహా |
త్రైలోక్యమణ్డనా నారీ నరేశ్వరవరార్చితా || ౪౫||
త్రైలోక్యసున్దరీ రామా మహావిభవవాహినీ |
పద్మస్థా పద్మనిలయా పద్మమాలావిభూషితా || ౪౬||
పద్మయుగ్మధరా కాన్తా దివ్యాభరణభూషితా |
విచిత్రరత్నముకుటా విచిత్రామ్బరభూషణా || ౪౭||
విచిత్రమాల్యగన్ధాఢ్యా విచిత్రాయుధవాహనా |
మహానారాయణీ దేవీ వైష్ణవీ వీరవన్దితా || ౪౮||
కాలసంకర్షిణీ ఘోరా తత్త్వసంకర్షిణీకలా |
జగత్సమ్పూరణీ విశ్వా మహావిభవభూషణా || ౪౯||
వారుణీ వరదా వ్యాఖ్యా ఘణ్టాకర్ణవిరాజితా |
నృసింహీ భైరవీ బ్రాహ్మీ భాస్కరీ వ్యోమచారిణీ || ౫౦||
ఐన్ద్రీ కామధేనుః సృష్టిః కామయోనిర్మహాప్రభా |
దృష్టా కామ్యా విశ్వశక్తిర్బీజగత్యాత్మదర్శనా || ౫౧||
గరుడారూఢహృదయా చాన్ద్రీ శ్రీర్మధురాననా |
మహోగ్రరూపా వారాహీ నారసింహీ హతాసురా || ౫౨||
యుగాన్తహుతభుగ్జ్వాలా కరాలా పిఙ్గలాకలా |
త్రైలోక్యభూషణా భీమా శ్యామా త్రైలోక్యమోహినీ || ౫౩||
మహోత్కటా మహారక్తా మహాచణ్డా మహాసనా |
శఙ్ఖినీ లేఖినీ స్వస్థా లిఖితా ఖేచరేశ్వరీ || ౫౪||
భద్రకాలీ చైకవీరా కౌమారీ భవమాలినీ |
కల్యాణీ కామధుగ్జ్వాలాముఖీ చోత్పలమాలికా || ౫౫||
బాలికా ధనదా సూర్యా హృదయోత్పలమాలికా |
అజితా వర్షిణీ రీతిర్భరుణ్డా గరుడాసనా || ౫౬||
వైశ్వానరీ మహామాయా మహాకాలీ విభీషణా |
మహామన్దారవిభవా శివానన్దా రతిప్రియా || ౫౭||
ఉద్రీతిః పద్మమాలా చ ధర్మవేగా విభావనీ |
సత్క్రియా దేవసేనా చ హిరణ్యరజతాశ్రయా || ౫౮||
సహసావర్తమానా చ హస్తినాదప్రబోధినీ |
హిరణ్యపద్మవర్ణా చ హరిభద్రా సుదుర్ద్ధరా || ౫౯||
సూర్యా హిరణ్యప్రకటసదృశీ హేమమాలినీ |
పద్మాననా నిత్యపుష్టా దేవమాతా మృతోద్భవా || ౬౦||
మహాధనా చ యా శృఙ్గీ కర్ద్దమీ కమ్బుకన్ధరా |
ఆదిత్యవర్ణా చన్ద్రాభా గన్ధద్వారా దురాసదా || ౬౧||
వరాచితా వరారోహా వరేణ్యా విష్ణువల్లభా |
కల్యాణీ వరదా వామా వామేశీ విన్ధ్యవాసినీ || ౬౨||
యోగనిద్రా యోగరతా దేవకీ కామరూపిణీ |
కంసవిద్రావిణీ దుర్గా కౌమారీ కౌశికీ క్షమా || ౬౩||
కాత్యాయనీ కాలరాత్రిర్నిశితృప్తా సుదుర్జయా |
విరూపాక్షీ విశాలాక్షీ భక్తానాంపరిరక్షిణీ || ౬౪||
బహురూపా స్వరూపా చ విరూపా రూపవర్జితా |
ఘణ్టానినాదబహులా జీమూతధ్వనినిఃస్వనా || ౬౫||
మహాదేవేన్ద్రమథినీ భ్రుకుటీకుటిలాననా |
సత్యోపయాచితా చైకా కౌబేరీ బ్రహ్మచారిణీ || ౬౬||
ఆర్యా యశోదా సుతదా ధర్మకామార్థమోక్షదా |
దారిద్ర్యదుఃఖశమనీ ఘోరదుర్గార్తినాశినీ || ౬౭||
భక్తార్తిశమనీ భవ్యా భవభర్గాపహారిణీ |
క్షీరాబ్ధితనయా పద్మా కమలా ధరణీధరా || ౬౮||
రుక్మిణీ రోహిణీ సీతా సత్యభామా యశస్వినీ |
ప్రజ్ఞాధారామితప్రజ్ఞా వేదమాతా యశోవతీ || ౬౯||
సమాధిర్భావనా మైత్రీ కరుణా భక్తవత్సలా |
అన్తర్వేదీ దక్షిణా చ బ్రహ్మచర్యపరాగతిః || ౭౦||
దీక్షా వీక్షా పరీక్షా చ సమీక్షా వీరవత్సలా |
అమ్బికా సురభిః సిద్ధా సిద్ధవిద్యాధరార్చితా || ౭౧||
సుదీక్షా లేలిహానా చ కరాలా విశ్వపూరకా |
విశ్వసంధారిణీ దీప్తిస్తాపనీ తాణ్డవప్రియా || ౭౨||
ఉద్భవా విరజా రాజ్ఞీ తాపనీ బిన్దుమాలినీ |
క్షీరధారాసుప్రభావా లోకమాతా సువర్చసా || ౭౩||
హవ్యగర్భా చాజ్యగర్భా జుహ్వతోయజ్ఞసమ్భవా |
ఆప్యాయనీ పావనీ చ దహనీ దహనాశ్రయా || ౭౪||
మాతృకా మాధవీ ముఖ్యా మోక్షలక్ష్మీర్మహర్ద్ధిదా |
సర్వకామప్రదా భద్రా సుభద్రా సర్వమఙ్గలా || ౭౫||
శ్వేతా సుశుక్లవసనా శుక్లమాల్యానులేపనా |
హంసా హీనకరీ హంసీ హృద్యా హృత్కమలాలయా || ౭౬||
సితాతపత్రా సుశ్రోణీ పద్మపత్రాయతేక్షణా |
సావిత్రీ సత్యసంకల్పా కామదా కామకామినీ || ౭౭||
దర్శనీయా దృశా దృశ్యా స్పృశ్యా సేవ్యా వరాఙ్గనా |
భోగప్రియా భోగవతీ భోగీన్ద్రశయనాసనా || ౭౮||
ఆర్ద్రా పుష్కరిణీ పుణ్యా పావనీ పాపసూదనీ |
శ్రీమతీ చ శుభాకారా పరమైశ్వర్యభూతిదా || ౭౯||
అచిన్త్యానన్తవిభవా భవభావవిభావనీ |
నిశ్రేణిః సర్వదేహస్థా సర్వభూతనమస్కృతా || ౮౦||
బలా బలాధికా దేవీ గౌతమీ గోకులాలయా |
తోషిణీ పూర్ణచన్ద్రాభా ఏకానన్దా శతాననా || ౮౧||
ఉద్యాననగరద్వారహర్మ్యోపవనవాసినీ |
కూష్మాణ్డా దారుణా చణ్డా కిరాతీ నన్దనాలయా || ౮౨||
కాలాయనా కాలగమ్యా భయదా భయనాశినీ |
సౌదామనీ మేఘరవా దైత్యదానవమర్దినీ || ౮౩||
జగన్మాతా భయకరీ భూతధాత్రీ సుదుర్లభా |
కాశ్యపీ శుభదాతా చ వనమాలా శుభావరా || ౮౪||
ధన్యా ధన్యేశ్వరీ ధన్యా రత్నదా వసువర్ద్ధినీ |
గాన్ధర్వీ రేవతీ గఙ్గా శకునీ విమలాననా || ౮౫||
ఇడా శాన్తికరీ చైవ తామసీ కమలాలయా |
ఆజ్యపా వజ్రకౌమారీ సోమపా కుసుమాశ్రయా || ౮౬||
జగత్ప్రియా చ సరథా దుర్జయా ఖగవాహనా |
మనోభవా కామచారా సిద్ధచారణసేవితా || ౮౭||
వ్యోమలక్ష్మీర్మహాలక్ష్మీస్తేజోలక్ష్మీః సుజాజ్వలా |
రసలక్ష్మీర్జగద్యోనిర్గన్ధలక్ష్మీర్వనాశ్రయా || ౮౮||
శ్రవణా శ్రావణీ నేత్రీ రసనాప్రాణచారిణీ |
విరిఞ్చిమాతా విభవా వరవారిజవాహనా || ౮౯||
వీర్యా వీరేశ్వరీ వన్ద్యా విశోకా వసువర్ద్ధినీ |
అనాహతా కుణ్డలినీ నలినీ వనవాసినీ || ౯౦||
గాన్ధారిణీన్ద్రనమితా సురేన్ద్రనమితా సతీ |
సర్వమఙ్గల్యమాఙ్గల్యా సర్వకామసమృద్ధిదా || ౯౧||
సర్వానన్దా మహానన్దా సత్కీర్తిః సిద్ధసేవితా |
సినీవాలీ కుహూ రాకా అమా చానుమతిర్ద్యుతిః || ౯౨||
అరున్ధతీ వసుమతీ భార్గవీ వాస్తుదేవతా |
మాయూరీ వజ్రవేతాలీ వజ్రహస్తా వరాననా || ౯౩||
అనఘా ధరణిర్ధీరా ధమనీ మణిభూషణా |
రాజశ్రీ రూపసహితా బ్రహ్మశ్రీర్బ్రహ్మవన్దితా || ౯౪||
జయశ్రీర్జయదా జ్ఞేయా సర్గశ్రీః స్వర్గతిః సతామ్ |
సుపుష్పా పుష్పనిలయా ఫలశ్రీర్నిష్కలప్రియా || ౯౫||
ధనుర్లక్ష్మీస్త్వమిలితా పరక్రోధనివారిణీ |
కద్రూర్ద్ధనాయుః కపిలా సురసా సురమోహినీ || ౯౬||
మహాశ్వేతా మహానీలా మహామూర్తిర్విషాపహా |
సుప్రభా జ్వాలినీ దీప్తిస్తృప్తిర్వ్యాప్తిః ప్రభాకరీ || ౯౭||
తేజోవతీ పద్మబోధా మదలేఖారుణావతీ |
రత్నా రత్నావలీ భూతా శతధామా శతాపహా || ౯౮||
త్రిగుణా ఘోషిణీ రక్ష్యా నర్ద్దినీ ఘోషవర్జితా |
సాధ్యా దితిర్దితిదేవీ మృగవాహా మృగాఙ్కగా || ౯౯||
చిత్రనీలోత్పలగతా వృషరత్నకరాశ్రయా |
హిరణ్యరజతద్వన్ద్వా శఙ్ఖభద్రాసనాస్థితా || ౧౦౦||
గోమూత్రగోమయక్షీరదధిసర్పిర్జలాశ్రయా |
మరీచిశ్చీరవసనా పూర్ణా చన్ద్రార్కవిష్టరా || ౧౦౧||
సుసూక్ష్మా నిర్వృతిః స్థూలా నివృత్తారాతిరేవ చ |
మరీచిజ్వాలినీ ధూమ్రా హవ్యవాహా హిరణ్యదా || ౧౦౨||
దాయినీ కాలినీ సిద్ధిః శోషిణీ సమ్ప్రబోధినీ |
భాస్వరా సంహతిస్తీక్ష్ణా ప్రచణ్డజ్వలనోజ్జ్వలా || ౧౦౩||
సాఙ్గా ప్రచణ్డా దీప్తా చ వైద్యుతిః సుమహాద్యుతిః |
కపిలా నీలరక్తా చ సుషుమ్ణా విస్ఫులిఙ్గినీ || ౧౦౪||
అర్చిష్మతీ రిపుహరా దీర్ఘా ధూమావలీ జరా |
సమ్పూర్ణమణ్డలా పూషా స్రంసినీ సుమనోహరా || ౧౦౫||
జయా పుష్టికరీచ్ఛాయా మానసా హృదయోజ్జ్వలా |
సువర్ణకరణీ శ్రేష్ఠా మృతసంజీవినీరణే || ౧౦౬||
విశల్యకరణీ శుభ్రా సంధినీ పరమౌషధిః |
బ్రహ్మిష్ఠా బ్రహ్మసహితా ఐన్దవీ రత్నసమ్భవా || ౧౦౭||
విద్యుత్ప్రభా బిన్దుమతీ త్రిస్వభావగుణామ్బికా |
నిత్యోదితా నిత్యహృష్టా నిత్యకామకరీషిణీ || ౧౦౮||
పద్మాఙ్కా వజ్రచిహ్నా చ వక్రదణ్డవిభాసినీ |
విదేహపూజితా కన్యా మాయా విజయవాహినీ || ౧౦౯||
మానినీ మఙ్గలా మాన్యా మాలినీ మానదాయినీ |
విశ్వేశ్వరీ గణవతీ మణ్డలా మణ్డలేశ్వరీ || ౧౧౦||
హరిప్రియా భౌమసుతా మనోజ్ఞా మతిదాయినీ |
ప్రత్యఙ్గిరా సోమగుప్తా మనోఽభిజ్ఞా వదన్మతిః || ౧౧౧||
యశోధరా రత్నమాలా కృష్ణా త్రైలోక్యబన్ధనీ |
అమృతా ధారిణీ హర్షా వినతా వల్లకీ శచీ || ౧౧౨||
సంకల్పా భామినీ మిశ్రా కాదమ్బర్యమృతప్రభా |
అగతా నిర్గతా వజ్రా సుహితా సంహితాక్షతా || ౧౧౩||
సర్వార్థసాధనకరీ ధాతుర్ధారణికామలా |
కరుణాధారసమ్భూతా కమలాక్షీ శశిప్రియా || ౧౧౪||
సౌమ్యరూపా మహాదీప్తా మహాజ్వాలా వికాశినీ |
మాలా కాఞ్చనమాలా చ సద్వజ్రా కనకప్రభా || ౧౧౫||
ప్రక్రియా పరమా యోక్త్రీ క్షోభికా చ సుఖోదయా |
విజృమ్భణా చ వజ్రాఖ్యా శృఙ్ఖలా కమలేక్షణా || ౧౧౬||
జయంకరీ మధుమతీ హరితా శశినీ శివా |
మూలప్రకృతిరీశానీ యోగమాతా మనోజవా || ౧౧౭||
ధర్మోదయా భానుమతీ సర్వాభాసా సుఖావహా |
ధురన్ధరా చ బాలా చ ధర్మసేవ్యా తథాగతా || ౧౧౮||
సుకుమారా సౌమ్యముఖీ సౌమ్యసమ్బోధనోత్తమా |
సుముఖీ సర్వతోభద్రా గుహ్యశక్తిర్గుహాలయా || ౧౧౯||
హలాయుధా చైకవీరా సర్వశస్త్రసుధారిణీ |
వ్యోమశక్తిర్మహాదేహా వ్యోమగా మధుమన్మయీ || ౧౨౦||
గఙ్గా వితస్తా యమునా చన్ద్రభాగా సరస్వతీ |
తిలోత్తమోర్వశీ రమ్భా స్వామినీ సురసున్దరీ || ౧౨౧||
బాణప్రహరణావాలా బిమ్బోష్ఠీ చారుహాసినీ |
కకుద్మినీ చారుపృష్ఠా దృష్టాదృష్టఫలప్రదా || ౧౨౨||
కామ్యాచరీ చ కామ్యా చ కామాచారవిహారిణీ |
హిమశైలేన్ద్రసంకాశా గజేన్ద్రవరవాహనా || ౧౨౩||
అశేషసుఖసౌభాగ్యసమ్పదా యోనిరుత్తమా |
సర్వోత్కృష్టా సర్వమయీ సర్వా సర్వేశ్వరప్రియా || ౧౨౪||
సర్వాఙ్గయోనిః సావ్యక్తా సంప్రధానేశ్వరేశ్వరీ |
విష్ణువక్షఃస్థలగతా కిమతః పరముచ్యతే || ౧౨౫||
పరా నిర్మహిమా దేవీ హరివక్షఃస్థలాశ్రయా |
సా దేవీ పాపహన్త్రీ చ సాన్నిధ్యం కురుతాన్మమ || ౧౨౬||
ఇతి నామ్నాం సహస్రం తు లక్ష్మ్యాః ప్రోక్తం శుభావహమ్ |
పరావరేణ భేదేన ముఖ్యగౌణేన భాగతః || ౧౨౭||
యశ్చైతత్ కీర్తయేన్నిత్యం శృణుయాద్ వాపి పద్మజ |
శుచిః సమాహితో భూత్వా భక్తిశ్రద్ధాసమన్వితః || ౧౨౮||
శ్రీనివాసం సమభ్యర్చ్య పుష్పధూపానులేపనైః |
భోగైశ్చ మధుపర్కాద్యైర్యథాశక్తి జగద్గురుమ్ || ౧౨౯||
తత్పార్శ్వస్థాం శ్రియం దేవీం సమ్పూజ్య శ్రీధరప్రియామ్ |
తతో నామసహస్రోణ తోషయేత్ పరమేశ్వరీమ్ || ౧౩౦||
నామరత్నావలీస్తోత్రమిదం యః సతతం పఠేత్ |
ప్రసాదాభిముఖీలక్ష్మీః సర్వం తస్మై ప్రయచ్ఛతి || ౧౩౧||
యస్యా లక్ష్మ్యాశ్చ సమ్భూతాః శక్తయో విశ్వగాః సదా |
కారణత్వే న తిష్ఠన్తి జగత్యస్మింశ్చరాచరే || ౧౩౨||
తస్మాత్ ప్రీతా జగన్మాతా శ్రీర్యస్యాచ్యుతవల్లభా |
సుప్రీతాః శక్తయస్తస్య సిద్ధిమిష్టాం దిశన్తి హి || ౧౩౩||
ఏక ఏవ జగత్స్వామీ శక్తిమానచ్యుతః ప్రభుః |
తదంశశక్తిమన్తోఽన్యే బ్రహ్మేశానాదయో యథా || ౧౩౪||
తథైవైకా పరా శక్తిః శ్రీస్తస్య కరుణాశ్రయా |
జ్ఞానాదిషాఙ్గుణ్యమయీ యా ప్రోక్తా ప్రకృతిః పరా || ౧౩౫||
ఏకైవ శక్తిః శ్రీస్తస్యా ద్వితీయాత్మని వర్తతే |
పరా పరేశీ సర్వేశీ సర్వాకారా సనాతనీ || ౧౩౬||
అనన్తనామధేయా చ శక్తిచక్రస్య నాయికా |
జగచ్చరాచరమిదం సర్వం వ్యాప్య వ్యవస్థితా || ౧౩౭||
తస్మాదేకైవ పరమా శ్రీర్జ్ఞేయా విశ్వరూపిణీ |
సౌమ్యా సౌమ్యేన రూపేణ సంస్థితా నటజీవవత్ || ౧౩౮||
యో యో జగతి పుమ్భావః స విష్ణురితి నిశ్చయః |
యా యా తు నారీభావస్థా తత్ర లక్ష్మీర్వ్యవస్థితా || ౧౩౯||
ప్రకృతేః పురుషాచ్చాన్యస్తృతీయో నైవ విద్యతే |
అథ కిం బహునోక్తేన నరనారీమయో హరిః || ౧౪౦||
అనేకభేదభిన్నస్తు క్రియతే పరమేశ్వరః |
మహావిభూతిం దయితాం యే స్తువన్త్యచ్యుతప్రియామ్ || ౧౪౧||
తే ప్రాప్నువన్తి పరమాం లక్ష్మీం సంశుద్ధచేతసః |
పద్మయోనిరిదం ప్రాప్య పఠన్ స్తోత్రమిదం క్రమాత్ || ౧౪౨||
దివ్యమష్టగుణైశ్వర్యం తత్ప్రసాదాచ్చ లబ్ధవాన్ |
సకామానాం చ ఫలదామకామానాం చ మోక్షదామ్ || ౧౪౩||
పుస్తకాఖ్యాం భయత్రాత్రీం సితవస్త్రాం త్రిలోచనామ్ |
మహాపద్మనిషణ్ణాం తాం లక్ష్మీమజరతాం నమః || ౧౪౪||
కరయుగలగృహీతం పూర్ణకుమ్భం దధానా
క్వచిదమలగతస్థా శఙ్ఖపద్మాక్షపాణిః |
క్వచిదపి దయితాఙ్గే చామరవ్యగ్రహస్తా
క్వచిదపి సృణిపాశం బిభ్రతీ హేమకాన్తిః || ౧౪౫||

|| ఇత్యాదిబ్రహ్మపురాణే కాశ్మీరవర్ణనే హిరణ్యగర్భహృదయే
సర్వకామప్రదాయకం పురుషోత్తమప్రోక్తం శ్రీలక్ష్మీసహస్రనామస్తోత్రం సమాప్తమ్ ||