Sri Venkatesha Mangalashasanam

  .. అథ వేఙ్కటేశ మఙ్గలాశాసనమ్ ..

శ్రియః కాన్తాయ కల్యాణ నిధయే నిధయేఽర్థినాం
శ్రీవేఙ్కటనివాసాయ శ్రీనివాసాయ మఙ్గలమ్ .. ౧

లక్ష్మీ సవిభ్రమాలోక సుభ్రూ విభ్రమచక్షుషే
చక్షుషే సర్వలోకానాం వేఙ్కటేశాయ మఙ్గలమ్ .. ౨

శ్రీ వేఙ్కటాద్రి శృఙ్గాఙ్గ్ర మఙ్గలాభరణాఙ్ఘ్రయే
మఙ్గలానాం నివాసాయ వేఙ్కటేశాయ మఙ్గలమ్ .. ౩

సర్వావయవసౌన్దర్య సంపదా సర్వచేతసాం
సదా సమ్మోహనాయాస్తు వేఙ్కటేశాయ మఙ్గలమ్ .. ౪

నిత్యాయ నిరవద్యాయ సత్యానన్దచిదాత్మనే
సర్వాన్తరాత్మనే శ్రీమద్ వేఙ్కటేశాయ మఙ్గలమ్ .. ౫

స్వతస్సర్వవిదే సర్వ శక్తయే సర్వశేషిణే
సులభాయ సుశీలాయా వేఙ్కటేశాయ మఙ్గలమ్ .. ౬

పరస్మై బ్రహ్మణే పూర్ణకామాయ పరమాత్మనే
ప్రయుంజే పరతత్త్వాయ వేఙ్కటేశాయ మఙ్గలమ్ .. ౭

ఆకాల తత్త్వమశ్రాన్తం ఆత్మనాం అనుపశ్యతాం
అతృప్త్యమృతరూపాయ వేఙ్కటేశాయ మఙ్గలమ్ .. ౮

ప్రాయస్స్వచరణౌ పుంసాం శరణ్యత్వేన పాణినా
కృపయాఽఽదిశతే శ్రీమద్ వేఙ్కటేశాయ మఙ్గలమ్ .. ౯

దయామృత తరఙ్గిణ్యాస్తరఙ్గైరివ శీతలైః
అపాంగైః సించతే విశ్వం వేఙ్కటేశాయ మఙ్గలమ్ .. ౧౦

స్రగ్భూషామ్బరహేతీనాం సుషమావహ మూర్తయే
సర్వార్తి శమనాయాస్తు వేఙ్కటేశాయ మఙ్గలమ్ .. ౧౧

శ్రీవైకుణ్ఠవిరక్తాయ స్వామిపుష్కరిణీతటే
రమయా రమమాణాయ వేఙ్కటేశాయ మఙ్గలమ్ .. ౧౨

శ్రీమద్సున్దరజామాతృముని మానసవాసినే
సర్వలోక నివాసాయ శ్రీనివాసాయ మఙ్గలమ్ .. ౧౩

మఙ్గలాశాసనపరైర్మదాచార్య పురోగమైః
సర్వైశ్చ పూర్వైరాచార్యైః సత్కృతాయాస్తు మఙ్గలమ్ .. ౧౪

      .. ఇతి వేఙ్కటేశ మఙ్గలాశాసనమ్ ..

          .. ఓం తత్ సత్ ..

Sri Venkatesha prapatthi

 .. అథ వేఙ్కటేశ ప్రపత్తి ..

ఈశానాం జగతోఽస్య వేఙ్కటపతేః విష్ణోః పరాం ప్రేయసీం
తద్వక్షస్స్థల నిత్య వాసరసికాం తత్క్షాన్తి సంవర్ధినీం .
పద్మాలఙ్కృతపాణిపల్లవయుగాం పద్మాసనస్థాం శ్రియం
వాత్సల్యాదిగుణోజ్జ్వలాం భగవతీం వందే జగన్మాతరం .. ౧

శ్రీమన్ కృపాజలనిధే కృతసర్వలోక
సర్వజ్ఞ శక్త నతవత్సల సర్వశేషిన్ .
స్వామిన్ సుశీలసులభాశ్రితపారిజాత
శ్రీవేఙ్కటేశచరణౌ శరణం ప్రపద్యే .. ౨

ఆనూపురార్పితసుజాతసుగన్ధిపుష్ప
సౌరభ్యసౌరభకరౌ సమసన్నివేశౌ .
సౌమ్యౌ సదాఽనుభవనేఽపి నవానుభావ్యౌ
శ్రీవేఙ్కటేశచరణౌ శరణం ప్రపద్యే .. ౩

సద్యోవికాసిసముదిత్వరసాన్ద్రరాగ
సౌరభ్యనిర్భరసరోరుహసామ్యవార్తాం .
సమ్యక్షు సాహసపదేషు విలేఖయన్తౌ
శ్రీవేఙ్కటేశచరణౌ శరణం ప్రపద్యే .. ౪

రేఖామయధ్వజసుధాకలశాతపత్ర
వజ్రాఙ్కుశామ్బురుహకల్పకశఙ్ఖచక్రైః .
భవ్యైరలఙ్కృతతలౌ పరతత్వ చిన్హైః
శ్రీవేఙ్కటేశచరణౌ శరణం ప్రపద్యే .. ౫

తామ్రోదరద్యుతిపరాజితపద్మరాగౌ
బాహ్యైర్మహోభిరభిభూతమహేన్ద్రనీలౌ .
ఉధ్యన్నఖాంశుభిరుదస్తశశాఙ్కభాసౌ
శ్రీవేఙ్కటేశచరణౌ శరణం ప్రపద్యే .. ౬

సప్రేమభీతి కమలాకరపల్లవాభ్యాం
సంవాహనేఽపి సపది క్లమమాదధానౌ .
కాన్తావవాఙ్గ్మనసగోచరసౌకుమార్యౌ
శ్రీవేఙ్కటేశచరణౌ శరణం ప్రపద్యే .. ౭

లక్ష్మీమహీతదనురూపనిజానుభావ
నీలాదిదివ్యమహిషీకరపల్లవానాం .
ఆరుణ్యసఙ్క్రమణతః కిల సాన్ద్రరాగౌ
శ్రీవేఙ్కటేశచరణౌ శరణం ప్రపద్యే .. ౮

నిత్యాన్నమద్విధిశివాదికిరీటకోటి
ప్రత్యుప్త దీప్త నవరత్న మహఃప్రరోహైః .
నీరాజనా విధిముదారముపాదధానౌ
శ్రీవేఙ్కటేశ చరణౌ శరణం ప్రపద్యే .. ౯

విష్ణోః పదే పరమ ఇత్యుతిదప్రశంసౌ
యౌ మధ్వ ఉత్స ఇతి భోగ్యతయాఽప్యపాత్తౌ .
భూయస్తథేతి తవ పాణితలప్రదిష్టౌ
శ్రీవేఙ్కటేశ చరణౌ శరణం ప్రపద్యే .. ౧౦

పార్థాయ తత్సదృశ సారథినా త్వయైవ
యౌ దర్శితౌ స్వచరణౌ శరణం వ్రజేతి .
భూయోఽపి మహ్యమిహతౌ కరదర్శితౌ తే
శ్రీ వేఙ్కటేశ చరణౌ శరణం ప్రపద్యే .. ౧౧

మన్మూర్ధ్ని కాలియఫణే వికటాటవీషు
శ్రీ వేఙ్కటాద్రిశిఖరే శిరసి శ్రుతీనాం ..
చిత్తేఽప్యనన్యమనసాం సమమాహితౌతే
శ్రీవేఙ్కటేశ చరణౌ శరణం ప్రపద్యే .. ౧౨

అమ్లానహృష్యదవనీతలకీర్ణపుష్పౌ
శ్రీవేఙ్కటాద్రి శిఖరాభరణాయమానౌ .
ఆనన్దితాఖిల మనో నయనౌ తవైతౌ
శ్రీవేఙ్కటేశ చరణౌ శరణం ప్రపద్యే .. ౧౩

ప్రాయః ప్రపన్న జనతా ప్రథమావగాహ్యౌ
మాతుస్స్తనావివ శిశోరమృతాయమానౌ .
ప్రాప్తౌపరస్పరతులామతులాన్తరౌ తే
శ్రీవేఙ్కటేశ చరణౌ శరణం ప్రపద్యే .. ౧౪

సత్వోత్తరైస్సతత సేవ్యపదామ్బుజేన
సంసారతారకదయార్ద్ర దృగంచలేన .
సౌమ్యోపయన్తృమునినా మమ దర్శితౌ తే
శ్రీవేఙ్కటేశ చరణౌ శరణం ప్రపద్యే .. ౧౫

శ్రీశ శ్రియా ఘటికయా త్వదుపాయభావే
ప్రాప్యే త్వయి స్వయముపేయతయాస్ఫురన్త్యా .
నిత్యాశ్రితాయ నిరవద్యగుణాయ తుభ్యం
స్యాం కిఙ్కరో వృషగిరీశ న జాతు మహ్యమ్ .. ౧౬

  .. ఇతి వేఙ్కటేశ ప్రపత్తి ..

Sri Venkateshvara Stotram

.. అథ వేఙ్కటేశ స్తోత్రమ్ ..

కమలా కుచ చూచుక కుఙ్కుమతో
నియతారుణితాతుల నీలతనో .
కమలాయతలోచన లోకపతే
విజయీ భవ వేఙ్కటశైలపతే .. ౧

సచతుర్ముఖషణ్ముఖపఞ్చముఖ
ప్రముఖాఖిలదైవతమౌలిమణే .
శరణాగతవత్సల సారనిధే
పరిపాలయ మాం వృషశైలపతే .. ౨

అతివేలతయా తవ దుర్విషహైః
అనువేలకృతైరపరాధశతైః .
భరితం త్వరితం వృషశైలపతే
పరయా కృపయా పరిపాహి హరే .. ౩

అధివేఙ్కటశైలముదారమతే
జనతాభిమతాధికదానరతాత్ .
పరదేవతయా గదితాన్నిగమైః
కమలాదయితాన్న పరం కలయే .. ౪

కలవేణురవావశగోపవధూ
శతకోటివృతాత్స్మరకోటిసమాత్ .
ప్రతివల్లవికాభిమతాత్సుఖదాత్
వసుదేవసుతాన్న పరం కలయే .. ౫

అభిరామగుణాకర దాశరథే
జగదేకధనుర్ధర ధీరమతే .
రఘునాయక రామ రమేశ విభో
వరదోభవ దేవ దయాజలధే .. ౬

అవనీతనయాకమనీయకరం
రజనీకరచారుముఖామ్బురుహం .
రజనీచరరాజతమోమిహిరం
మహనీయమహం రఘురామ మయే .. ౭

సుముఖం సుహృదం సులభం సుఖదం
స్వనుజం చ సుఖాయమమోఘశరం .
అపహాయ రఘూద్వహమన్యమహం
న కథఞ్చన కఞ్చన జాతు భజే .. ౮

వినా వేఙ్కటేశం న నాథో నాథః
సదా వేఙ్కటేశం స్మరామి స్మరామి .
హరే వేఙ్కటేశ ప్రసీద ప్రసీద
ప్రియం వేఙ్కటేశ ప్రయచ్ఛ ప్రయచ్ఛ .. ౯

అహం దూరతస్తే పదామ్భోజయుగ్మ
ప్రణామేచ్ఛయాఽఽగత్య సేవాం కరోమి .
సకృత్సేవయా నిత్యసేవాఫలం త్వం
ప్రయచ్ఛ ప్రయచ్ఛ ప్రభో వేఙ్కటేశ .. ౧౦

అజ్ఞానినా మయా దోషాన్
అశేషాన్విహితాన్ హరే .
క్షమస్వ త్వం క్షమస్వ త్వం
శేషశైల శిఖామణే .. ౧౧

  .. ఇతి వేఙ్కటేశ స్తోత్రమ్ ..

Sri Venkateshvara Suprabhatam

శ్రీ వేఙ్కటేశ సుప్రభాతమ్

            .. శ్రీః ..

   .. అథ శ్రీ వేఙ్కటేశ సుప్రభాతమ్ ..

కౌసల్యా సుప్రజా రామ పూర్వా సన్ధ్యా ప్రవర్తతే
ఉత్తిష్ఠ నరశార్దూల కర్తవ్యం దైవమాహ్నికమ్ ..  ౧

ఉత్తిష్ఠోత్తిష్ఠ గోవిన్ద ఉత్తిష్ఠ గరుడధ్వజ
ఉత్తిష్ఠ కమలాకాన్త త్రైలోక్యం మఙ్గలం కురు .. ౨

మాతస్సమస్తజగతాం మధుకైటభారేః
వక్షోవిహారిణి మనోహరదివ్యమూర్తే .
శ్రీస్వామిని శ్రితజనప్రియదానశీలే
శ్రీవేఙ్కటేశదయితే తవ సుప్రభాతమ్ .. ౩

తవ సుప్రభాతమరవిన్దలోచనే
భవతు ప్రసన్నముఖచన్ద్రమణ్డలే .
విధిశఙ్కరేన్ద్రవనితాభిరర్చితే
వృషశైలనాథదయితే దయానిధే .. ౪

అత్ర్యాదిసప్తఋషయస్సముపాస్య సన్ధ్యాం
ఆకాశసిన్ధుకమలాని మనోహరాణి .
ఆదాయ పాదయుగమర్చయితుం ప్రపన్నాః
శేషాద్రిశేఖరవిభో తవ సుప్రభాతమ్ .. ౫

పఞ్చాననాబ్జభవషణ్ముఖవాసవాద్యాః
త్రైవిక్రమాదిచరితం విబుధాః స్తువన్తి .
భాషాపతిః పఠతి వాసర శుద్ధిమారాత్
శేషాద్రిశేఖరవిభో తవ సుప్రభాతమ్ .. ౬

ఈషత్ప్రఫుల్లసరసీరుహనారికేల
పూగద్రుమాదిసుమనోహరపాలికానాం .
ఆవాతి మన్దమనిలస్సహ దివ్యగన్ధైః
శేషాద్రిశేఖరవిభో తవ సుప్రభాతమ్ .. ౭

ఉన్మీల్య నేత్రయుగముత్తమ పంజరస్థాః
పాత్రావశిష్టకదలీఫలపాయసాని .
భుక్త్వా సలీలమథ కేలిశుకాః పఠన్తి
శేషాద్రిశేఖరవిభో తవ సుప్రభాతమ్ .. ౮

తన్త్రీప్రకర్షమధురస్వనయా విపఞ్చ్యా
గాయత్యనన్తిచరితం తవ నారదోఽపి .
భాషాసమగ్రమసకృత్కరచారరమ్యం
శేషాద్రిశేఖరవిభో తవ సుప్రభాతమ్ .. ౯

భృఙ్గావలీ చ మకరన్దరసానువిద్ధ
ఝఙ్కారగీత నినదైఃసహ సేవనాయ .
నిర్యాత్యుపాన్తసరసీకమలోదరేభ్యః
శేషాద్రిశేఖరవిభో తవ సుప్రభాతమ్ .. ౧౦

యోషాగణేన వరదధ్నివిమథ్యమానే
ఘోషాలయేషు దధిమన్థనతీవ్రఘోషాః .
రోషాత్కలిం విదధతేకకుభశ్చ కుమ్భాః
శేషాద్రిశేఖరవిభో తవ సుప్రభాతమ్ .. ౧౧

పద్మేశమిత్రశతపత్రగతాలివర్గాః
హర్తుం శ్రియం కువలయస్య నిజాఙ్గలక్ష్మ్యా .
భేరీనినాదమివ బిభ్రతి తీవ్రనాదం
శేషాద్రిశేఖరవిభో తవ సుప్రభాతమ్ .. ౧౨

శ్రీమన్నభీష్ట వరదాఖిలలోకబన్ధో
శ్రీశ్రీనివాస జగదేకదయైకసిన్ధో .
శ్రీదేవతాగృహభుజాన్తర దివ్య మూర్తే
శ్రీవేఙ్కటాచలపతే తవ సుప్రభాతమ్ .. ౧౩

శ్రీస్వామిపుష్కరిణికాఽఽప్లవనిర్మలాఙ్గాః
శ్రేయోఽర్థినో హరవిరించసనన్దనాద్యాః .
ద్వారే వసన్తి వరవేత్రహతోత్తమాఙ్గాః
శ్రీవేఙ్కటాచలపతే తవ సుప్రభాతమ్ .. ౧౪

శ్రీ శేషశైల గరుడాచల వేఙ్కటాద్రి
నారాయణాద్రి వృషభాద్రి వృషాద్రి ముఖ్యామ్ .
ఆఖ్యామ్ త్వదీయ వసతేరనిశం వదన్తి
శ్రీవేఙ్కటాచలపతే తవ సుప్రభాతమ్ .. ౧౫

సేవాపరాః శివసురేశకృశానుధర్మ
రక్షోఽమ్బునాథ పవమాన ధనాధినాథాః .
బద్ధాంజలి ప్రవిలసన్నిజశీర్ష దేశాః
శ్రీవేఙ్కటాచలపతే తవ సుప్రభాతమ్ .. ౧౬

ఘాటీషు తే విహగరాజ మృగాధిరాజ-
నాగాధిరాజ గజరాజ హయాధిరాజాః .
స్వస్వాధికార మహిమాధికమర్థయన్తే
శ్రీవేఙ్కటాచలపతే తవ సుప్రభాతమ్ .. ౧౭

సూర్యేన్దు భౌమ బుధ వాక్పతి కావ్య సౌరి
స్వర్భాను కేతు దివిషత్పరిషత్ప్రధానాః .
త్వద్దాస దాస చరమావధి దాసదాసాః
శ్రీవేఙ్కటాచలపతే తవ సుప్రభాతమ్ .. ౧౮

త్వత్పాదధూలి భరితస్ఫురితోత్తమాఙ్గాః
స్వర్గాపవర్గ నిరపేక్ష నిజాన్తరఙ్గాః .
కల్పాగమాఽఽకలనయాఽఽకులతాం లభన్తే
శ్రీవేఙ్కటాచలపతే తవ సుప్రభాతమ్ .. ౧౯

త్వద్గోపురాగ్రశిఖరాణి నిరీక్షమాణాః
స్వర్గాపవర్గపదవీం పరమాం శ్రయన్తః .
మర్త్యా మనుష్యభువనే మతిమాశ్రయన్తే
శ్రీవేఙ్కటాచలపతే తవ సుప్రభాతమ్ .. ౨౦

శ్రీభూమినాయక దయాదిగుణామృతాబ్ధే
దేవాధిదేవ జగదేకశరణ్యమూర్తే .
శ్రీమన్ననన్త గరుడాదిభిరర్చితాఙ్ఘ్రే
శ్రీవేఙ్కటాచలపతే తవ సుప్రభాతమ్ .. ౨౧

శ్రీపద్మనాభ పురుషోత్తమ వాసుదేవ
వైకుణ్ఠ మాధవ జనార్దన చక్రపాణే .
శ్రీవత్సచిన్హ శరణాగతపారిజాత
శ్రీవేఙ్కటాచలపతే తవ సుప్రభాతమ్ .. ౨౨

కన్దర్పదర్ప హరసున్దర దివ్యమూర్తే
కాన్తాకుచామ్బురుహ కుట్మల లోలదృష్టే .
కల్యాణనిర్మలగుణాకర దివ్యకీర్తే
శ్రీవేఙ్కటాచలపతే తవ సుప్రభాతమ్ .. ౨౩

మీనాకృతే కమఠ కోల నృసింహ వర్ణిన్
స్వామిన్ పరశ్వథతపోధన రామచన్ద్ర .
శేషాంశరామ యదునన్దన కల్కిరూప
శ్రీవేఙ్కటాచలపతే తవ సుప్రభాతమ్ .. ౨౪

ఏలా లవఙ్గ ఘనసార సుగన్ధి తీర్థం
దివ్యం వియత్సరితి హేమఘటేషు పూర్ణమ్ .
ధృత్వాఽఽద్య వైదిక శిఖామణయః ప్రహృష్టాః
తిష్ఠన్తి వేఙ్కటపతే తవ సుప్రభాతమ్ .. ౨౫

భాస్వానుదేతి వికచాని సరోరుహాణి
సంపూరయన్తి నినదైః కకుభో విహఙ్గాః .
శ్రీవైష్ణవాస్సతతమర్థిత మఙ్గలాస్తే
ధామాఽఽశ్రయన్తి తవ వేఙ్కట సుప్రభాతమ్ .. ౨౬

బ్రహ్మాదయః సురవరాస్సమహర్షయస్తే
సన్తస్సనన్దన ముఖాస్త్వథ యోగివర్యాః .
ధామాన్తికే తవ హి మఙ్గలవస్తు హస్తాః
శ్రీవేఙ్కటాచలపతే తవ సుప్రభాతమ్ .. ౨౭

లక్ష్మీనివాస నిరవద్యగుణైకసిన్ధో
సంసార సాగర సముత్తరణైకసేతో .
వేదాన్తవేద్యనిజవైభవ భక్తభోగ్య
శ్రీవేఙ్కటాచలపతే తవ సుప్రభాతమ్ .. ౨౮

ఇత్థం వృషాచలపతేరిహ సుప్రభాతమ్
యే మానవాః ప్రతిదినం పఠితుం ప్రవృత్తాః .
తేషాం ప్రభాతసమయే స్మృతిరఙ్గభాజాం
ప్రజ్ఞాం పరార్థసులభాం పరమాం ప్రసూతే .. ౨౯

 .. ఇతి వేఙ్కటేశ సుప్రభాతమ్ ..