Seetha Rama Stotram (Hanumat Krutam)

సీతారామస్తోత్ర (హనుమత్ కృతం)

అయోధ్యాపురనేతారం మిథిలాపురనాయికామ్ |
రాఘవాణామలంకారం వైదేహానామలంక్రియామ్ || ౧||

రఘూణాం కులదీపం చ నిమీనాం కులదీపికామ్ |
సూర్యవంశసముద్భూతం సోమవంశసముద్భవామ్ || ౨||

పుత్రం దశరథస్యాద్యం పుత్రీం జనకభూపతేః |
వశిష్ఠానుమతాచారం శతానన్దమతానుగామ్ || ౩||

కౌసల్యాగర్భసంభూతం వేదిగర్భోదితాం స్వయమ్ |
పుణ్డరీకవిశాలాక్షం స్ఫురదిన్దీవరేక్షణామ్ || ౪||

చన్ద్రకాన్తాననాంభోజం చన్ద్రబింబోపమాననామ్ |
మత్తమాతఙ్గగమనమ్ మత్తహంసవధూగతామ్ || ౫||

చన్దనార్ద్రభుజామధ్యం కుంకుమార్ద్రకుచస్థలీమ్ |
చాపాలంకృతహస్తాబ్జం పద్మాలంకృతపాణికామ్ || ౬||

శరణాగతగోప్తారం ప్రణిపాదప్రసాదికామ్ |
కాలమేఘనిభం రామం కార్తస్వరసమప్రభామ్ || ౭||

దివ్యసింహాసనాసీనం దివ్యస్రగ్వస్త్రభూషణామ్ |
అనుక్షణం కటాక్షాభ్యాం అన్యోన్యేక్షణకాంక్షిణౌ || ౮||

అన్యోన్యసదృశాకారౌ త్రైలోక్యగృహదంపతీ|
ఇమౌ యువాం ప్రణమ్యాహం భజామ్యద్య కృతార్థతామ్ || ౯||

అనేన స్తౌతి యః స్తుత్యం రామం సీతాం చ భక్తితః |
తస్య తౌ తనుతాం పుణ్యాస్సంపదః సకలార్థదాః || ౧౦||

ఏవం శ్రీరాచన్ద్రస్య జానక్యాశ్చ విశేషతః |
కృతం హనూమతా పుణ్యం స్తోత్రం సద్యో విముక్తిదమ్ |
యః పఠేత్ప్రాతరుత్థాయ సర్వాన్ కామానవాప్నుయాత్ || ౧౧||

|| ఇతి హనూమత్కృతసీతారామ స్తోత్రం సంపూర్ణమ||

Shri Rama Stotram (Jatayu Kritam - Adhyatma Ramayanam)

జటాయుకృతం రామస్తోత్రమ్ 

జటాయురువాచ

అగణితగుణమప్రమేయమాద్యం సకలజగత్స్థితిసంయమాదిహేతుమ్ |
ఉపరమపరమం పరాత్మభూతం సతతమహం ప్రణతోఽస్మి రామచన్ద్రమ్|| ౧

నిరవధిసుఖమిన్దిరాకటాక్షం క్షపితసురేన్ద్రచతుర్ముఖాదిదుఃఖమ్ |
నరవరమనిశం నతోఽస్మి రామం వరదమహం వరచాపబాణహస్తమ్ || ౨||

త్రిభువనకమనీయరూపమీడ్యం రవిశతభాసురమీహితప్రదానమ్ |
శరణదమనిశం సురాగమూలే కృతనిలయం రఘునన్దనం ప్రపద్యే || ౩||

భవవిపినదవాగ్నినామధేయం భవముఖదైవతదైవతం దయాలుమ్ |
దనుజపతిసహస్రకోటినాశం రవితనయాసదృశం హరిం ప్రపద్యే || ౪||

అవిరతభవభావనాతిదూరం భవవిముఖైర్మునిభిః సదైవ దృశ్యమ్ |
భవజలధిసుతారణాఙ్ఘ్రిపోతం శరణమహం రఘునన్దనం ప్రపద్యే || ౫||

గిరిశగిరిసుతామనోనివాసం గిరివరధారిణమీహితాభిరామమ్ |
సురవరదనుజేన్ద్రసేవితాఙ్ఘ్రిం సురవరదం రఘునాయకం ప్రపద్యే || ౬||

పరధనపరదారవర్జితానాం పరగుణభూతిషు తుష్టమానసానామ్ |
పరహితనిరతాత్మనాం సుసేవ్యం రఘువరమమ్బుజలోచనం ప్రపద్యే || ౭||

స్మితరుచిరవికాసితాననాబ్జమతిసులభం సురరాజనీలనీలమ్ |
సితజలరుహచారునేత్రశోభం రఘుపతిమీశగురోర్గురుం ప్రపద్యే || ౮||

హరికమలజశమ్భురూపభేదాత్త్వమిహ విభాసి గుణత్రయానువృత్తః |
రవిరివ జలపూరితోదపాత్రేష్వమరపతిస్తుతిపాత్రమీశమీడే || ౯||

రతిపతిశతకోటిసున్దరాఙ్గం శతపథగోచరభావనావిదూరమ్ |
యతిపతిహృదయే సదా విభాతం రఘుపతిమార్తిహరం ప్రభుం ప్రపద్యే || ౧౦||

ఇత్యేవం స్తువతస్తస్య ప్రసన్నోఽభూద్రఘూత్తమః |
ఉవాచ గచ్ఛ భద్రం తే మమ విష్ణోః పరం పదమ్ || ౧౧||

శృణోతి య ఇదం స్తోత్రం లిఖేద్వా నియతః పఠేత్ |
స యాతి మమ సారూప్యం మరణే మత్స్మృతిం లభేత్ || ౧౨||

ఇతి రాఘవభాషితం తదా శ్రుతవాన్ హర్షసమాకులో ద్విజః ||
రఘునన్దనసామ్యమాస్థితః ప్రయయౌ బ్రహ్మసుపూజితం పదమ్ || ౧౩||

|| ఇతి శ్రీమదధ్యాత్మరామాయణే అరణ్యకాణ్డేఽష్టమే
                    సర్గే జటాయుకృతం శ్రీరామస్తోత్ర ||

ShreebRama Ashtottara Shatha Nama Stotram (Ananda Ramayanam)

                                   రామాష్టోత్తరశతనామ స్తోత్రం 

|| అథ శ్రీమదానన్దరామాయణాన్తర్గత శ్రీరామాష్టోత్తరశతనామ స్తోత్రమ్ ||

శ్రీ కుంభోదర ఉవాచ
అష్టోత్తరశతం నామ్నాం తస్య స్తోత్రం వదాంయహమ్ |

అస్య శ్రీ రామచన్ద్ర నామాష్టోత్తర శతమన్త్రస్య బ్రహ్మా ఋషిః |
అనుష్టుప్ ఛన్దః |
జానకీవల్లభః శ్రీరామచన్ద్రో దేవతా |
ఓం బీజమ్ |
నమః శక్తిః |
శ్రీ రామచన్ద్రేతి కీలకమ్ |
శ్రీ రామచన్ద్ర ప్రీత్యర్థే జపే వినియోగః ||

కరన్యాసః ||
ఓం నమో భగవతే రాజాధిరాజాయ పరమాత్మనే అఙ్గుష్ఠాభ్యాం నమః |
ఓం నమో భగవతే విద్యాధిరాజాయ హయగ్రీవాయ తర్జనీభ్యాం నమః |
ఓం నమో భగవతే జానకీ వల్లభాయ నమః మధ్యమాభ్యాం నమః |
ఓం నమో భగవతే రఘునన్దనాయ అమితతేజసే అనామికాభ్యాం నమః |
ఓం నమో భగవతే క్షీరాబ్ధిమధ్యస్థాయ నారాయణాయ
కనిష్ఠికాభ్యాం నమః |
ఓం నమో భగవతే సత్ప్రకాశాయ రామాయ కరతల
కరపృష్ఠాభ్యాం నమః ||

అఙ్గన్యాసః ||
ఓం నమో భగవతే రాజాధిరాజాయ పరమాత్మనే హృదయాయ నమః |
ఓం నమో భగవతే విద్యాధిరాజాయ హయగ్రీవాయ శిరసే స్వాహా |
ఓం నమో భగవతే జానకీ వల్లభాయ నమః శికాయై వషట్ |
ఓం నమో భగవతే రఘునన్దనాయ అమితతేజసే కవచాయ హుమ్ |
ఓం నమో భగవతే క్షీరాబ్ధిమధ్యస్థాయ నారాయణాయ నేత్రత్రయాయ
వౌషట్ |
ఓం నమో భగవతే సత్ప్రకాశాయ రామాయ అస్త్రాయ ఫట్ |
భూర్భువఃసువరోమితి దిగ్బన్ధః ||

అథ ధ్యానమ్ ||
మన్దారాకృతి పుణ్యధామ విలసత్ వక్షస్థలం కోమలమ్
శాన్తం కాన్తమహేన్ద్రనీల రుచిరాభాసం సహస్రాననమ్ |
వన్దేహం రఘునన్దనం సురపతిం కోదణ్డ దీక్షాగురుం
రామం సర్వజగత్ సుసేవితపదం సీతామనోవల్లభమ్ ||

సహస్ర శీర్షణే వై తుభ్యం సహస్రాక్షాయతే నమః |
నమః సహస్ర హస్తాయ సహస్ర చరణాయ చ || ౧||
నమో జీమూతవర్ణాయ నమస్తే విశ్వతోముఖ |
అచ్యుతాయ నమస్తుభ్యం నమస్తే శేషశాయినే || ౨||
నమో హిరణ్యగర్భాయ పఞ్చభూతాత్మనే నమః |
నమో మూల ప్రకృతయే దేవానాం హితకారిణే || ౩||
నమస్తే సర్వలోకేశ సర్వదుఃఖ నిషూదన |
శఙ్ఖ చక్ర గదాపద్మ జటా మకుట ధారిణే || ౪||
నమో గర్భాయ తత్త్వాయ జ్యోతిషాం జ్యోతిషే నమః |
ఓం నమో వసుదేవాయ నమో దశరథాత్మజ || ౫||
నమో నమస్తే రాజేన్ద్ర సర్వసమ్పత్ ప్రదాయ చ |
నమః కారుణ్యరూపాయా కైకేయీ ప్రియకారిణే || ౬||
నమో దాన్తాయ శాన్తాయ విశ్వామిత్ర ప్రియాయ తే |
యఙ్యేశాయ నమస్తుభ్యం నమస్తే క్రతుపాలక || ౭||
నమో నమః కేశవాయ నమో నాథాయ శార్ఙ్గిణే |
నమస్తే రామచన్ద్రాయ నమో నారాయణాయ చ || ౮||
నమస్తే రామచన్ద్రాయ మాధవాయ నమో నమః |
గోవిన్దాయ నమ్స్తుభ్యం నమస్తే పరమాత్మనే || ౯||
నమో విష్ణుస్వరూపాయ రఘునాథాయ తే నమః |
నమస్తే నాథనాథాయ నమస్తే మధుసూదన || ౧౦||
త్రివిక్రమ నమస్తేస్తు సీతాయాః పతయే నమః |
వామనాయ నమస్తుభ్యం నమస్తే రాఘవాయ చ || ౧౧||
నమో నమః శ్రీధరాయ జానకీ వల్లభాయ చ |
నమస్తేస్తు హృషీకేశ కన్దర్పాయ నమో నమః || ౧౨||
నమస్తే పద్మనాభాయ కౌసల్యా హర్షకారిణే |
నమో రాజీవనయన నమస్తే లక్ష్మణాగ్రజ || ౧౩||
నమో నమస్తే కాకుత్స్థ నమో దామోదరాయ చ |
విభీషణ పరిత్రాతః నమః సఙ్కర్షణాయ చ || ౧౪||
వాసుదేవ నమస్తేస్తు నమస్తే శఙ్కరప్రియ |
ప్రద్యుమ్నాయ నమస్తుభ్యం అనిరుద్ధాయ తే నమః || ౧౫||
సదసత్ భక్తిరూపాయ నమస్తే పురుషోత్తమ |
అధోక్షజ నమస్తేస్తు సప్తతాల హరాయ చ || ౧౬||
ఖరదూషణ సంహర్త్రే శ్రీనృసింహాయ తే నమః |
అచ్యుతాయ నమస్తుభ్యం నమస్తే సేతుబన్ధక || ౧౭||
జనార్దన నమస్తేస్తు నమో హనుమదాశ్రయ |
ఉపేన్ద్ర చన్ద్రవన్ద్యాయ మారీచ మథనాయ చ || ౧౮||
నమో వాలిప్రహరణ నమః సుగ్రీవ రాజ్యద |
జామదగ్న్య మహాదర్ప హరాయ హరయే నమః || ౧౯||
నమో నమస్తే కృష్ణాయ నమస్తే భరతాగ్రజ |
నమస్తే పితృభక్తాయ నమః శత్రుఘ్నపూర్వజ || ౨౦||
అయోధ్యాధిపతే తుభ్యం నమః శత్రుఘ్న సేవిత |
నమో నిత్యాయ సత్యాయ బుద్ధ్యాది ఙ్యానరూపిణే || ౨౧||
అద్వైత బ్రహ్మరూపాయ ఙ్యానగమ్యాయ తే నమః |
నమః పూర్ణాయ రమ్యాయ మాధవాయ చిదాత్మనే || ౨౨||
అయోధ్యేశాయ శ్రేష్ఠాయ చిన్మాత్రాయ పరాత్మనే |
నమోహల్యోద్ధారణాయ నమస్తే చాపభఙ్గిణే || ౨౩||
సీతారామాయ సేవ్యాయ స్తుత్యాయ పరమేష్ఠినే |
నమస్తే బాణహస్తాయ నమః కోదణ్డ ధారిణే || ౨౪||
నమః కబన్ధ హన్త్రే చ వాలిహన్త్రే నమోస్తుతే |
నమస్తేస్తు దశగ్రీవ ప్రాణ సంహార కారిణే || ౨౫||
అష్టోత్తరశతం నామ్నాం రామచన్ద్రస్య పావనమ్ |
ఏతత్ ప్రోక్తం మయా శ్రేష్ఠం సర్వపాతక నాశనమ్ || ౨౬||
ప్రచరిష్యతి తల్లోకే ప్రాణ్యదృష్టవశాద్ద్విజ |
తస్య కీర్తనమాత్రేణ జనా యాస్యన్తి సద్గతిమ్ || ౨౭||
తావద్ విజ్రుంభతే పాపం బ్రహ్మహత్యా పురస్సరమ్ |
యావన్నామాష్టక శతం పురుషో న హి కీర్తయేత్ || ౨౮||
తావత్ కలేర్ మహోత్సాహో నిఃశఙ్కం సంప్రవర్తతే |
యావత్ శ్రీరామచన్ద్రస్య శతం నామ్నాం న కీర్తితమ్ || ౨౯||
తావత్ స్వరూపం రామస్య దుర్బోధం ప్రాణినాం స్ఫుటమ్ |
యావన్ న నిష్ఠయా రామనామ మాహాత్మ్య ముత్తమమ్ || ౩౦||
కీర్తితం పఠితం చిత్తే ధృతం సంస్మారితం ముదా |
అన్యతః శ్రుణుయాన్ మర్త్యః సోపి ముచ్యేత పాతకాన్ || ౩౧||
బ్రహ్మహత్యాది పాపానాం నిష్కృతిం యది వాఞ్ఛతి |
రామస్తోత్రం మాసమేకం పఠిత్వా ముచ్యతే నరః || ౩౨||
దుష్ప్రతిగ్రహ దుర్భోజ్య దురాలాపాది సంభవమ్ |
పాపం సకృత్ కీర్తనేన రామస్తోత్రం వినాశయేత్ || ౩౩||
శ్రుతి స్మృతి పురాణేతిహాసాగమ శతాని చ |
అర్హన్తి నాల్పాం శ్రీరామనామ కీర్తికలామపి || ౩౪||
అష్టోత్తరశతం నామ్నాం సీతారామస్య పావనమ్ |
అస్య సఙ్కీర్తనాదేవ సర్వాన్ కామాన్ లభేన్నరః || ౩౫||
పుత్రార్థీ లభతే పుత్రాన్ ధనార్థీ ధనమాప్నుయాత్ |
స్త్రియం లభతి పత్న్యర్థీ స్తోత్రపాఠ శ్రవాదినా || ౩౬||
కుంభోదరేణ మునినా యేన స్తోరేణ రాఘవః |
స్తుతః పూర్వం యఙ్యవాటే తదేతత్ త్వాం మయోదితమ్ || ౩౭||

ఇతి శ్రీశతకోటి రామచరితాంతర్గత
శ్రీమదానన్దరామాయణే వాల్మికీయే యాగకాణ్డే
శ్రీరామనామాష్టోత్తర శతనామ స్తోత్రం సంపూర్ణమ్ ||

Rama Chandra Astakam

శ్రీ రామచన్ద్రాష్టకమ్

ఓం చిదాకారో ధాతా పరమసుఖదః పావనతనుః
మునీన్ద్రైర్యోగీన్ద్రైర్యతిపతిసురేన్ద్రైర్హనుమతా |
సదా సేవ్యః పూర్ణో జనకతనయాఙ్గః సురగురూ
రమానాథో రామో రమతు మమ చిత్తే తు సతతమ్ || ౧||

ముకున్దో గోవిన్దో జనకతనయాలాలితపదః
పదం ప్రాప్తా యస్యాధమకులభవా చాపి శబరీ |
గిరాతీతోఽగమ్యో విమలధిషణైర్వేదవచసా
రమానాథో రామో రమతు మమ చిత్తే తు సతతమ్ || ౨||

ధరాధీశోఽధీశః సురనరవరాణాం రఘుపతిః
కిరీటీ కేయూరీ కనకకపిశః శోభితవపుః |
సమాసీనః పీఠే రవిశతనిభే శాన్తమనసో
రమానాథో రామో రమతు మమ చిత్తే తు సతతమ్ || ౩||

వరేణ్యః శారణ్యః కపిపతిసఖశ్చాన్తవిధురో
లలాటే కాశ్మీరో రుచిరగతిభఙ్గః శశిముఖః |
నరాకారో రామో యతిపతినుతః సంసృతిహరో
రమానాథో రామో రమతు మమ చిత్తే తు సతతమ్ || ౪||

విరూపాక్షః కాశ్యాముపదిశతి యన్నామ శివదం
సహస్రం యన్నామ్నాం పఠతి గిరిజా ప్రత్యుషసి వై |
స్వలోకే గాయన్తీశ్వరవిధిముఖా యస్య చరితం
రమానాథో రామో రమతు మమ చిత్తే తు సతతమ్ || ౫||

పరో ధీరోఽధీరోఽసురకులభవశ్చాసురహరః
పరాత్మా సర్వజ్ఞో నరసురగణైర్గీతసుయశాః |
అహల్యాశాపఘ్నః శరకరఋజుఃకౌశికసఖో
రమానాథో రామో రమతు మమ చిత్తే తు సతతమ్ || ౬||

హృషీకేశః శౌరిర్ధరణిధరశాయీ మధురిపుర్
ఉపేన్ద్రో వైకుణ్ఠో గజరిపుహరస్తుష్టమనసా |
బలిధ్వంసీ వీరో దశరథసుతో నీతినిపుణో
రమానాథో రామో రమతు మమ చిత్తే తు సతతమ్ || ౭||

కవిః సౌమిత్రీడ్యః కపటమృగఘాతీ వనచరో
రణశ్లాఘీ దాన్తో ధరణిభరహర్తా సురనుతః |
అమానీ మానజ్ఞో నిఖిలజనపూజ్యో హృదిశయో
రమానాథో రామో రమతు మమ చిత్తే తు సతతమ్ || ౮||

ఇదం రామస్తోత్రం వరమమరదాసేన రచితమ్
ఉషఃకాలే భక్త్యా యది పఠతి యో భావసహితమ్ |
మనుష్యః స క్షిప్రం జనిమృతిభయం తాపజనకం
పరిత్యజ్య శ్రీష్ఠం రఘుపతిపదం యాతి శివదమ్ || ౯||

|| ఇతి శ్రీమద్రామదాసపూజ్యపాదశిష్యశ్రీమద్ధం
      సదాసశిష్యేణామరదాసాఖ్యకవినా విరచితం
      శ్రీరామచన్ద్రాష్టకం సమాప్తమ్ ||

Rama Stotram -Maha Deva Kritam (Adhyatma Ramayanam)

శ్రీమహాదేవకృతం రామస్తోత్రమ్


శ్రీ గణేశాయ నమః |

శ్రీమహాదేవ ఉవాచ |
నమోఽస్తు రామాయ సశక్తికాయ నీలోత్పలశ్యామలకోమలాయ |
కిరీటహారాఙ్గదభూషణాయ సింహాసనస్థాయ మహాప్రభాయ || ౧||

త్వమాదిమధ్యాన్తవిహీన ఏకః సృజస్యవస్యత్సి చ లోకజాతమ్ |
స్వమాయయా తేన న లిప్యసే త్వం యత్స్వే ముఖేఽజస్రరతోఽనవద్యః || ౨||

లీలాం విధత్సే గుణసంవృతస్త్వం ప్రపన్నభక్తానువిధానహేతోః |
నానావతారైః సురమానుషాద్యైః ప్రతీయసే జ్ఞానిభిరేవ నిత్యమ్ || ౩||

స్వాంశేన లోకం సకలం విధాయ తం బిభర్షి చ త్వం తదధః ఫణీశ్వరః |
ఉపర్యధో భాన్వనిలోడుపౌషధీప్రవర్షరూపోఽవసి నైకధా జగత్ || ౪||

త్వమిహ దేహభృతాం శిఖిరూపః పచసి భక్తమశేషమజస్రమ్ |
పవనమఞ్చకరూపసహాయో జగదఖణ్డమనేన బిభర్షి || ౫||

చన్ద్రసూర్యశిఖిమధ్యగతం యత్తేజ ఈశ చిదశేషతనూనామ్ |
ప్రాభవత్తనుభృతామిహ ధైర్యం శౌర్యమాత్రమఖిలం తవ సత్త్వమ్ || ౬||

త్వం విరిఞ్చిశివవిష్ణువిభేదాత్ కాలకర్మశశిసూర్యవిభాగాత్ |
వాదినాం పృథగివేశ బిభాసి బ్రహ్మ నిశ్చితమనన్యదిహైకమ్ || ౭||

మత్స్యాదిరూపేణ యథా త్వమేకః శ్రుతో పురాణేషు చ లోకసిద్ధః |
తథైవ సర్వం సదయద్విభాగస్త్వమేవ నాన్యద్భవతో విభాతి || ౮||

యద్యత్సముత్పన్నమనన్తసృష్టావుత్పత్స్యతే యచ్చ భవచ్చ యచ్చ |
న దృశ్యతే స్థావరజఙ్గమాదౌ త్వయా వినాఽతః పరతః పరస్త్వమ్ || ౯||

తత్వం న జానన్తి పరాత్మనస్తే జనః సమస్తాస్తవ మాయయాఽతః |
త్వద్భక్తసేవామలమానసానాం విభాతి తత్వం పరమేకమైశమ్ || ౧౦||

బ్రహ్మాదయస్తే న విదుః స్వరూపం చిదాత్మతత్వం బహిరర్థభావాః |
తతో బుధస్త్వామిదమేవ రూపం భక్త్యా భజన్ముక్తిముపైత్యదుఃఖః || ౧౧||

అహం భవన్నామగుణైః కృతార్థో వసామి కాశ్యామనిశం భవాన్యా |
ముమూర్షమాణస్య విముక్తయేఽహం దిశామి మన్త్రం తవ రామనామ || ౧౨||

ఇమం స్తవం నిత్యమనన్యభక్త్యా శ్రృణ్వన్తి గాయన్తి లిఖన్తి యే వై |
తే సర్వసౌఖ్యం పరమం చ లబ్ధా భవత్పదం యాన్తు భవత్ప్రసాదాత్ || ౧౩||

|| ఇతి శ్రీమదధ్యాత్మరామాయణే శ్రీమహాదేవకృతం రామస్తోత్రం సమ్పూర్ణమ్ ||

Shri Rama Stotram (Brahma Kritam- Adhyatma Ramayanam)

బ్రహ్మదేవకృతం రామస్తుతిః


శ్రీ గణేశాయ నమః |
బ్రహ్మోవాచః |
వన్దే దేవం విష్ణుమశేషస్థితిహేతుం త్వామధ్యాత్మజ్ఞానిభిరన్తర్హృది భావ్యమ్ |
హేయాహేయద్వన్ద్వవిహీనం పరమేకం సత్తామాత్రం సర్వహృదిస్థం దృశిరూపమ్ || ౧||

ప్రాణాపానౌ నిశ్చయబుద్ధ్యా హృది రుద్ధ్వా ఛిత్వా సర్వం సంశయబన్ధం విషయౌఘాన్ |
పశ్యన్తీశం యం గతమోహా యతయస్తం వన్దే రామం రత్నకిరీటం రవిభాసమ్ || ౨||

మాయాతీతం మాధవమాద్యం జగదాదిం మానాతీతం మోహవినాశం మునివన్ద్యమ్ |
యోగిధ్యేయం యోగవిధానం పరిపూర్ణం వన్దే రామం రఞ్జితలోకం రమణీయమ్ || ౩||

భావాభావప్రత్యయహీనం భవముఖ్యైర్భోగాసక్తైరర్చితపాదామ్బుజయుగ్మమ్ |
నిత్యం శుద్ధం బుద్ధమనన్తం ప్రణవాఖ్యం వన్దే రామం వీరమశేషాసురదావమ్ || ౪||

త్వం మే నాథో నాథితకార్యాఖిలకారీ మానాతీతో మాధవరూపోఽఖిలధారీ |
భక్త్యా గమ్యో భావితరూపో భవహారీ యోగాభ్యాసైర్భావితచేతఃసహచారీ || ౫||

త్వామాద్యన్తం లోకతతీనాం పరమీశం లోకానాం నో లౌకికమానైరధిగమ్యమ్ |
భక్తిశ్రద్ధాభావసమేతైర్భజనీయం వన్దే రామం సున్దరమిన్దీవరనీలమ్ || ౬||

కో వా జ్ఞాతుం త్వామతిమానం గతమానం మానాసక్తో మాధవశక్తో మునిమాన్యమ్ |
వృన్దారణ్యే వన్దితవృన్దారకవృన్దం వన్దే రామం భవముఖవన్ద్యం సుఖకన్దమ్ || ౭||

నానాశాస్త్రైర్వేదకదమ్బైః ప్రతిపాద్యం నిత్యానన్దం నిర్విషయజ్ఞానమనాదిమ్ |
మత్సేవార్థం మానుషభావం ప్రతిపన్నం వన్దే రామం మరకతవర్ణం మథురేశమ్ || ౮||

శ్రద్ధాయుక్తో యః పఠతీమం స్తవమాద్యం బ్రాహ్మం బ్రహ్మజ్ఞానవిధానం భువి మర్త్యః |
రామం శ్యామం కామితకామప్రదమీశం ధ్యాత్వా ధ్యాతా పాతకజాలైర్విగతః స్యాత్ || ౯||

|| ఇతి శ్రీమద్ధ్యాత్మరామాయణే యుద్ధకాణ్డే బ్రహ్మదేవకృతం రామస్తోత్రం సమ్పూర్ణమ్ ||

Rama Stotram (Ahalya kritam - Adhyatma Ramayanam)

అహల్యాకృతం రామస్తోత్రమ్


శ్రీ గణేశాయ నమః |

అహల్యోవాచః |
అహో కృతార్థాఽస్మి జగన్నివాస తే పాదాబ్జసంల్లగ్నరజః కణాదహమ్ |
స్పృశామి యత్పద్మజశఙ్కరాదిభిర్విమృగ్యతే రన్ధితమానసైః సదా || ౧||

అహో విచిత్రం తవ రామ చేష్టితం మనుష్యభావేన విమోహితం జగత్ |
చలస్యజస్రం చరణాదివర్జితః సమ్పూర్ణ ఆనన్దమయోఽతిమాయికః || ౨||

యత్పాదపఙ్కజపరాగపవిత్రగాత్రా భాగీరథీ భవవిరిఞ్చిముఖాన్పునాతి |
సాక్షాత్స ఏవ మమ దృగ్విషయో యదాఽఽస్తే కిం వర్ణ్యతే మమ పురాకృతభాగధేయమ్ || ౩||

మర్త్యావతారే మనుజాకృతిం హరిం రామాభిధేయం రమణీయదేహినమ్ |
ధనుర్ధరం పద్మవిశాలలోచనం భజామి నిత్యం న పరాన్భజిష్యే || ౪||

యత్పాదపఙ్కరజఃశ్రుతిభిర్విమృగ్యం యన్నభిపఙ్కజభవః కమలాసనశ్చ |
యన్నామసారరసికో భగవాన్పురారిస్తం రామచన్ద్రమనిశం హృది భావయామి || ౫||

యస్యావతారచరితాని విరిఞ్చిలోకే గాయన్తి నారదముఖా భవపద్మజాద్మాః |
ఆనన్దజాశ్రుపరిషిక్తకుచాగ్రసీమా వాగీశ్వరీ చ తమహం శరణం ప్రపద్యే || ౬||

సోఽయం పరాత్మా పురుషః పురాణ ఏషః స్వయంజ్యోతిరనన్త ఆద్యః |
మాయాతనుం లోకవిమోహనీయాం ధత్తే పరానుగ్రహ ఏష రామః || ౭||

అయం హి విశ్వోద్భవసంయమానామేకః స్వమాయాగుణబిమ్బితో యః |
విరిఞ్చివిష్ణ్వీశ్వరనామభేదాన్ ధత్తే స్వతన్త్రః పరిపూర్ణ ఆత్మా || ౮||

నమోఽస్తు తే రామ తవాఙ్ఘ్రిపఙ్కజం శ్రియా ధృతం వక్షసి లాలితం ప్రియాత్ |
ఆక్రాన్తమేకేన జగత్త్రయం పురా ధ్యేయం మునీన్ద్రైరభిమానవర్జితైః || ౯||
జగతామాదిభూతస్త్వం జగత్త్వం జగదాశ్రయః |
సర్వభూతేష్వసంయుక్త ఏకో భాతి భవాన్పరః || ౧౦||

ఓంకారవాచ్యస్త్వం రామ వాచామవిషయః పుమాన్ |
వాచ్యవాచకభేదేన భవానేవ జగన్మయః || ౧౧||

కార్యకారణకర్తృత్వసఫలసాధనభేదతః |
ఏకో విభాసి రామ త్వం మాయయా బహురూపయా || ౧౨||

త్వన్మాయామోహితధియస్త్వాం న జానన్తి తత్వతః |
మానుషం త్వాఽభిమన్యన్తే మాయినం పరమేశ్వరమ్ || ౧౩||

ఆకాశవత్త్వం సర్వత్ర బహిరన్తర్గతోఽమలః |
అసఙ్గో హ్యచలో నిత్యః శుద్ధో బుద్ధః సదవ్యయః || ౧౪||

యోషిన్మూఢాహమజ్ఞా తే తత్వం జానే కథం విభో |
తస్మాత్తే శతశో రామ నమస్కుర్యామనన్యధీః || ౧౫||

దేవ మే యత్రకుత్రాపి స్థితాయా అపి సర్వదా |
త్వత్పాదకమలే సక్తా భక్తిరేవ సదాఽస్తు మే || ౧౬||

నమస్తే పురుషాధ్యక్ష నమస్తే భక్తవత్సల |
నమస్తేఽస్తు హృషీకేశ నారాయణ నమోఽస్తు తే || ౧౭||

భవభయహరమేకం భానుకోటిప్రకాశం కరధృతశరచాపం కాలమేఘావభాసమ్ |
కనకరుచిరవస్త్రం రత్నవత్కుణ్డలాఢ్యం కమలవిశదనేత్రం సానుజం రామమీడే || ౧౮||

స్తుత్వైవం పురుషం సాక్షాద్రాఘవం పురతః స్థితమ్ |
పరిక్రమ్య ప్రణమ్యాశు సానుజ్ఞాతా యయౌ పతిమ్ || ౧౯||

అహల్యయా కృతం స్తోత్రం యః పఠేద్భక్తిసంయుతః |
స ముచ్యతేఽఖిలైః పాపైః పరం బ్రహ్మాధిగచ్ఛతి || ౨౦||

పుత్రాద్యర్థే పఠేద్భక్త్యా రామం హృది నిధాయ చ |
సంవత్సరేణ లభతే వన్ధ్యా అపి సుపుత్రకమ్ || ౨౧||

సర్వాన్కామానవాప్నోతి రామచన్ద్రప్రసాదతః || ౨౨||

బ్రహ్మఘ్నో గురుతల్పగోఽపి పురుషః స్తేయీ సురాపోఽపి వా
మాతృభ్రాతృవిహింసకోఽపి సతతం భోగైకబద్ధాదరః |
నిత్యం స్తోత్రమిదం జపన్రఘుపతిం భక్త్యా హృదిస్థం స్మరన్
ధ్యాయన్ ముక్తిముపైతి కిం పునరసౌ స్వాచారయుక్తో నరః || ౨౩||

|| ఇతి శ్రీమదధ్యాత్మరామాయణే అహల్యావిరచితం రామచన్ద్రస్తోత్రం సమ్పూర్ణమ||

Shri Rama Shatpadi

                     శ్రీ రామషట్పదీ


శ్రీ గణేశాయ నమః |

తరణికులజలతరణే తరుణతరణితేజసా విభాతరణే |
కృతవిదశదశముఖముఖతిమిరగణేఽన్తస్తమో నుద మే || ౧||

శయవిధృతశరశరాసన నిఖిలఖలోజ్జాసనప్రథితసుయశాః |
మథితహృదయాన్తరాలం దుష్కృతిజాలం మమాపనయ || ౨||

సురుచిరమరీచినిచయాంశ్చరణనఖేన్దూనుదాయ మమ హృదయే |
హృదయేశ వికలతాపం స్వసకలతాపం కిలాపహర || ౩||

ఇన్దీవరదలసున్దర వరదలసద్వామజానకీజానే |
జానే త్వామఖిలేశం లేశలసల్లోకలోకేశమ్ || ౪||

శం కురు శఙ్కరవల్లభ యల్లభతామాశ్వయం త్వదంఘ్రియుగే |
అనురక్తిదృఢాం భక్తిం చిరస్య చిన్తాబ్ధిభవభక్తిమ్ || ౫||

వైరాజరాజరాజోఽప్యభూత్సుసాకేతరాజనరరాజః |
వానరరాజసహాయో లీలాకైవల్యమేతద్ధి || ౬||

జగదసుసుతాసుపరవసుముదే యదేషా స్తుతిః కృతా స్ఫీతా |
సా రామషట్పదీయం విలసతు తత్పాదజలజాతే || ౭||

|| ఇతి శ్రీమన్మాలవీయశుక్ల శ్రీమన్మథురానాథప్రణీతా రామషట్పదీ సమాప్తా ||

Shri Rama Kavacham (Ananda Ramayanam)

రామకవచమ్

|| శ్రీమదానన్దరామాయణాన్తర్గత శ్రీ రామ కవచమ్ ||
|| ఓం శ్రీ రామాయ తుభ్యం నమః ||

అగస్తిరువాచ
ఆజానుబాహుమరవిన్దదళాయతాక్షాజన్మ
శుద్ధరస హాస ముఖప్రసాదమ్ |
శ్యామం గృహీత శరచాప ముదారరూపమ్ |
రామం సరామ మభిరామ మనుస్మరామి || ౧||
శ్రుణు వక్ష్యామ్యహం సర్వం సుత్తిక్ష్ణ మునిసత్తమ |
శ్రీరామకవచం పుణ్యం సర్వకామ ప్రదాయకమ్ || ౨||
అద్వైతానన్ద చైతన్య శుద్ధ సత్వైక లక్షణః |
బహిరన్తః సుతీక్ష్ణాత్ర రామచన్ద్రః ప్రకాశతే || ౩||
తత్వ విద్యార్థినో నిత్యం రమన్తే చిత్సుఖాత్మని |
ఇతి రామపదే నాసౌ పరబ్రహ్మాభిధీయతే || ౪||
జయరామేతి యన్నామ కీర్తయన్ నాభివర్ణయేత్ |
సర్వపాపైర్వినిర్ముక్తో యాతి విష్ణోః పరం పదమ్ || ౫||
శ్రీరామేతి పరం మన్త్రం తదేవ పరమం పదమ్ |
తదేవ తారకం విద్ధి జన్మ మృత్యు భయాపహమ్ || ౬||
శ్రీ రామేతి వదన్ బ్రహ్మభావమాప్నో త్యసంశయమ్ || ౭||

ఓం అస్య శ్రీ రామకవచస్య|, అగస్త్య ఋషిః |
అనుష్టుప్ ఛన్దః | సీతాలక్ష్మణోపేతః శ్రీరామచన్ద్రో దేవతా |
శ్రీ రామచన్ద్ర ప్రసాద సిద్ధ్యర్థం  జపే వినియోగః ||

అథధ్యానం ప్రవక్ష్యామి సర్వాభీష్ట ఫలప్రదమ్ |
నీలజీమూత సఙ్కాశం విద్యుద్ వర్ణామ్బరావృతమ్ || ౧||
కోమలాఙ్గం విశాలాక్షం యువానమతిసున్దరమ్ |
సీతాసౌమిత్రి సహితం జటామకుట ధారిణమ్ || ౨||
సాసితూరణ ధనుర్బాణ పాణిం దానవ మర్దనమ్ |
యదాచోరభయే రాజభయే శత్రుభయే తథా || ౩||
ధ్యాత్వా రఘుపతిం కృద్ధం కాలానల సమప్రభమ్ |
చీరకృష్ణాజినధరం భస్మోద్ధూళిత విగ్రహమ్ || ౪||
ఆకర్ణాకృష్ట సశర కోదణ్డ భుజమణ్డితమ్ |
రణే రిపూన్ రావణాదీన్ తీక్ష్ణమార్గణ వృష్టిభిః || ౫||
సమ్హరన్తం మహావీరం ఉగ్రం ఐన్ద్ర రథస్థితమ్ |
లక్ష్మణాద్యైర్మహావీరైర్వృతం హనుమదాదిభిః || ౬||
సుగ్రీవద్యైర్ మాహావీరైః శైల వృక్ష కరోద్యతైః |
వేగాత్ కరాలహుఙ్కారైః భుభుక్కార మహారవైః || ౭||
నదద్భిః పరివాదద్భిః సమరే రావణం ప్రతి |
శ్రీరామ శత్రుసఙ్ఘాన్ మే హన మర్దయ ఘాతయ || ౮||
భూతప్రేత పిశాచాదీన్ శ్రీరామశు వినాశయ |
ఏవం ధ్యాత్వా జపేత్ రామ కవచం సిద్ధి దాయకమ్ || ౯||
సుతీక్ష్ణ వజ్రకవచం శ్రుణువక్ష్యామ్యహం శుభమ్ |
శ్రీరామః పాతు మే మూర్ధ్ని పూర్వే చ రఘువంశజః || ౧౦||
దక్షిణే మే రఘువరః పశ్చిమే పాతు పావనః |
ఉత్తరే మే రఘుపతిః భాలం దశరథాత్మజః || ౧౧||
భృవోర్ దూర్వాదళశ్యామః తయోర్మధ్యే జనార్దనః |
శ్రోత్రం మే పాతు రాజేన్ద్రో దృశౌ రాజీవలోచనః || ౧౨||
ఘ్రాణం మే పాతు రాజర్షిః కణ్ఠం మే జానకీపతిః |
కర్ణమూలే ఖ్రధ్వంసీ భాలం మే రఘువల్లభః || ౧౩||
జిహ్వాం మే వాక్పతిః పాతు దన్తవల్యౌ రఘూత్తమః |
ఓష్ఠౌ శ్రీరామచన్ద్రో మే ముఖం పాతు పరాత్పరః || ౧౪||
కణ్ఠం పాతు జగత్ వన్ద్యః స్కన్ధౌ మే రావణాన్తకః |
ధనుర్బాణధరః పాతు భుజౌ మే వాలిమర్దనః || ౧౫||
సర్వాణ్యఙ్గుళి పర్వాణి హస్తౌ మే రాక్షసాన్తకః |
వక్షో మే పాతు కాకుత్స్థః పాతు మే హృదయం హరిః || ౧౬||
స్తనౌ సీతాపతిః పాతు పార్శ్వే మే జగదీశ్వరః |
మధ్యం మే పాతు లక్ష్మీశో నభిం మే రఘునాయకః || ౧౭||
కౌసల్యేయః కటిం పాతు పృష్టం దుర్గతి నాశనః |
గుహ్యం పాతు హృషీకేశః సక్థినీ సత్యవిక్రమః || ౧౮||
ఊరూ శార్ఙ్గధరః పాతు జానునీ హనుమత్ప్రియః |
జఙ్ఘే పాతు జగద్వ్యాపీ పాదౌ మే తాటికాన్తకః || ౧౯||
సర్వాఙ్గం పాతు మే విష్ణుః సర్వసన్ధీననామయః |
ఙ్యానేన్ద్రియాణి ప్రాణాదీన్ పాతు మే మధుసూదనః || ౨౦||
పాతు శ్రీరామభద్రో మే శబ్దాదీన్ విషయానపి |
ద్విపదాదీని భూతాని మత్సమ్బన్ధీని యాని చ || ౨౧||
జామతగ్న్య మహాదర్పదళనః పాతు తాని మే |
సౌమిత్రి పూర్వజః పాతు వాగాదీనీన్ద్రియాణి చ || ౨౨||
రోమాఙ్కురాణ్యశేషాణి పాతు సుగ్రీవ రాజ్యదః |
వాఙ్మనో బుద్ధ్యహఙ్కారైః ఙ్యానాఙ్యాన కృతాని చ || ౨౩||
జన్మాన్తర కృతానీహ పాపాని వివిధాని చ |
తాని సర్వాణి దగ్ధ్వాశు హరకోదణ్డఖణ్డనః || ౨౪||
పాతు మాం సర్వతో రామః శార్ఙ్గ బాణధరః సదా |
ఇతి శ్రీరామచన్ద్రస్య కవచం వజ్రసంమితమ్ || ౨౫||
గుహ్యాత్ గుహ్యతమం దివ్యం సుతీక్ష్ణ మునిసత్తమః |
యః పఠేత్ శ్రుణుయాద్వాపి శ్రావయేద్ వా సమాహితః || ౨౬||
స యాతి పరమం స్థానం రామచన్ద్ర ప్రసాదతః |
మహాపాతకయుక్తో వా గోఘ్నో వా భౄణహాతథా || ౨౭||
శ్రీరమచన్ద్ర కవచ పఠనాత్ సుద్ధి మాప్నుయాత్ |
బ్రహ్మహత్యాదిభిః పాపైః ముచ్యతే నాత్ర సంశయః || ౨౮||

ఇతి శ్రీ శతకోటిరామచరితాంతర్గత శ్రీమదానన్దరామాయణే
వాల్మికీయే మనోహరకాణ్డే శ్రీ రామకవచం సంపూర్ణమ్ ||

Indra Kritam Rama Stotram (Adhyatma Ramayanam)

ఇన్ద్రకృతం రామస్తోత్రమ్

ఇన్ద్ర ఉవాచ
భజేఽహం సదా రామమిన్దీవరాభం భవారణ్యదావానలాభాభిధానమ్ |
భవానీహృదా భావితానన్దరూపం భవాభావహేతుం భవాదిప్రపన్నమ్ || ౧||

సురానీకదుఃఖౌఘనాశైకహేతుం నరాకారదేహం నిరాకారమీడ్యమ్ |
పరేశం పరానన్దరూపం వరేణ్యం హరిం రామమీశం భజే భారనాశమ్ || ౨||

ప్రపన్నాఖిలానన్దదోహం ప్రపన్నం ప్రపన్నార్తినిఃశేషనాశాభిధానమ్ |
తపోయోగయోగీశభావాభిభావ్యం కపీశాదిమిత్రం భజే రామమిత్రమ్ || ౩||

సదా భోగభాజాం సుదూరే విభాన్తం సదా యోగభాజామదూరే విభాన్తమ్ |
చిదానన్దకన్దం సదా రాఘవేశం విదేహాత్మజానన్దరూపం ప్రపద్యే || ౪||

మహాయోగమాయావిశేషానుయుక్తో విభాసీశ లీలానరాకారవృత్తిః |
త్వదానన్దలీలాకథాపూర్ణకర్ణాః సదానన్దరూపా భవన్తీహ లోకే || ౫||

అహం మానపానాభిమత్తప్రమత్తో న వేదాఖిలేశాభిమానాభిమానః |
ఇదానీం భవత్పాదపద్మప్రసాదాత్త్రిలోకాధిపత్యాభిమానో వినష్టః || ౬||

స్ఫురద్రత్నకేయూరహారాభిరామం ధరాభారభూతాసురానీకదావమ్ |
శరచ్చన్ద్రవక్త్రం లసత్పద్మనేత్రం దురావారపారం భజే రాఘవేశమ్ || ౭||

సురాధీశనీలాభ్రనీలాఙ్గకాన్తిం విరాధాదిరక్షోవధాల్లోకశాన్తిమ్ |
కిరీటాదిశోభం పురారాతిలాభం భజే రామచన్ద్రం రఘూణామధీశమ్ || ౮||

లసచ్చన్ద్రకోటిప్రకాశాదిపీఠే సమాసీనమఙ్కే సమాధాయ సీతామ్ |
స్ఫురద్ధేమవర్ణాం తడిత్పుఞ్జభాసాం భజే రామచన్ద్రం నివృత్తార్తితన్ద్రమ్ || ౯||

|| ఇతి శ్రీమదధ్యాత్మరామాయణే యుద్ధకాణ్డే త్రయోదశసర్గే
ఇన్ద్రకృతశ్రీరామస్తోత్రం సమ్పూర్ణమ్ ||

Shri Rama Astakam

                     || అథ రామాష్టకమ్ ||

సుగ్రీవమిత్రం  పరమం పవిత్రం   సీతాకలత్రం  నవమేఘగాత్రమ్ |
కారుణ్య పాత్రం  శతపత్రనేత్రం   శ్రీరామచన్ద్రం  సతతం నమామి || ౧||

సంసారసారం  నిగమం ప్రచారం   ధర్మావతారం  హత భూమి భారమ్ |
సదా నిర్వికారం  సుఖ సిన్ధుసారం   శ్రీరామచన్ద్రం  సతతం నమామి || ౨||

లక్ష్మీ విలాసం  జగతాం  నివాసం   భూదేవ వాసం  సుఖ సిన్ధు హాసమ్ |
లఙ్కా వినాశం  భవనం ప్రకాశం   శ్రీరామచన్ద్రం  సతతం నమామి || ౩||

మందారమాలం  వచనే రసాలం   గుణయం విశలం  హత సప్తతాలమ్ |
క్రవ్యాదకాలం  సురలోకపాలం   శ్రీరామచన్ద్రం  సతతం నమామి || ౪||

వేదాంత జ్ఞానం  సకల సతానం   హంతారమానం  త్రిదశం ప్రధానమ్ |
గజేన్ద్రపాలం  విగతా విశాలం   శ్రీరామచన్ద్రం  సతతం నమామి || ౫||

ఖేలాఽతిభీతం  స్వజనే పునీతం   స్యామో ప్రగీతం  వచనే అహీతమ్ |
రాగేనగీతం  వచనే అహీతం   శ్రీరామచన్ద్రం  సతతం నమామి || ౬||

లీలాశరీరం  రణరఙ్గ ధీరం   విశ్వై కవీరం  రఘువంశధారమ్ |
గమ్భీరనాదం  జితసర్వవాదం   శ్రీరామచన్ద్రం  సతతం నమామి || ౭||

శ్యామాభిరామం  నయనాభిరామం   గుణాభిరామం  వచనాభిరామం |
విశ్వప్రణామం  కతభక్తికామం   శ్రీరామచన్ద్రం  సతతం నమామి || ౮||

                    || ఇతి రామాష్టకం సమ్పూర్ణమ్ ||

 ఏక శ్లోకీ రామాయణమ్

ఆదౌ రామ తపోవనాది గమనం   హత్వా మృగం కాఞ్చనమ్ |
               వైదేహీ హరణం జటాయు మరణం   సుగ్రీవ సమ్భాషణమ్ |
వాలీ నిర్దలనం సముద్ర తరణం  లఙ్కాపురీ దాహనమ్ |
               పశ్చాద్ రావణ కుంభకర్ణ హననం   చేతద్ధి రామాయణమ్ ||



                               ఇతి   ఏక శ్లోకీ రామాయణమ్

Shri Rama Bhujanga Stotram

శ్రీ రామభుజంగ స్తోత్రమ్

 విశుద్ధం పరం సచ్చిదానన్దరూపమ్
       గుణాధారమాధారహీనం వరేణ్యమ్ |
 మహాన్తం విభాన్తం గుహాన్తం గుణాన్తం
       సుఖాన్తం స్వయం ధామ రామం ప్రపద్యే || ౧ ||




 శివం నిత్యమేకం విభుం తారకాఖ్యం
       సుఖాకారమాకారశూన్యం సుమాన్యం |
 మహేశం కలేశం సురేశం పరేశం
       నరేశం నిరీశం మహీశం ప్రపద్యే || ౨ ||


 యదావర్ణయత్కర్ణమూలేఽన్తకాలే
       శివో రామ రామేతి రామేతి కాశ్యామ్ |
 తదేకం పరం తారకబ్రహ్మరూపం
        భజేఽహం భజేఽహం భజేఽహం భజేఽహమ్ || ౩ ||

మహారత్నపీఠే శుభే కల్పమూలే
       సుఖాసీనమాదిత్యకోటిప్రకాశమ్ |
 సదా జానకీలక్ష్మణోపేతమేకం
       సదా రామచన్ద్రమ్ భజేఽహం భజేఽహమ్  || ౪ ||


 క్వణద్రత్నమన్జీరపాదారవిన్దమ్
       లసన్మేఖలాచారుపీతామ్బరాఢ్యమ్ |
 మహారత్నహారోల్లసత్కౌస్తుభాఙ్గం
       నదచ్చంచరీమంజరీలోలమాలమ్ || ౫ ||



 లసచ్చన్ద్రికాస్మేరశోణాధరాభమ్
       సముద్యత్పతఙ్గేన్దుకోటిప్రకాశమ్ |
 నమద్బ్రహ్మరుద్రాదికోటీరరత్న
        స్ఫురత్కాన్తినీరాజనారాధితాన్ఘ్రిమ్ || ౬ ||


 పురః ప్రాఞ్జలీనాఞ్జనేయాదిభక్తాన్
        స్వచిన్ముద్రయా భద్రయా బోధయన్తమ్ |
 భజేఽహం భజేఽహం సదా రామచన్ద్రం
        త్వదన్యం న మన్యే న మన్యే న మన్యే || ౭ ||


 యదా మత్సమీపం కృతాన్తః సమేత్య
       ప్రచణ్డప్రతాపైర్భటైర్భీషయేన్మామ్ |
 తదావిష్కరోషి త్వదీయం స్వరూపం
       తదాపత్ప్రణాశం సకోదణ్డబాణమ్ || ౮ ||



 నిజే మానసే మన్దిరే సంనిధేహి
       ప్రసీద ప్రసీద ప్రభో రామచన్ద్ర |
 ససౌమిత్రిణా కైకేయీనన్దనేన
       స్వశక్త్యానుభక్త్యా చ సంసేవ్యమాన || ౯ ||


 స్వభక్తాగ్రగణ్యైః కపీశైర్మహీశై
       రనీకైరనేకైశ్చ రామ ప్రసీద  |
 నమస్తే నమోఽస్త్వీశ రామ ప్రసీద
       ప్రశాధి ప్రశాధి ప్రకాశం ప్రభో మామ్
                                               || ౧౦ ||


 త్వమేవాసి దైవం పరం మే యదేకం
       సుచైతన్యమేతత్త్వదన్యం న మన్యే |
 యతోఽభూదమేయం వియద్వాయుతేజో
        జలోర్వ్యాదికార్యం చరం చాచరం చ || ౧౧ ||





 నమః సచ్చిదానన్దరూపాయ తస్మై
        నమో దేవదేవాయ రామాయ తుభ్యమ్ |
 నమో జానకీజీవితేశాయ తుభ్యం
        నమః పుణ్డరీకాయతాక్షాయ తుభ్యమ్ || ౧౨ ||


 నమో భక్తియుక్తానురక్తాయ తుభ్యం
         నమః పుణ్యపుఞ్జైకలభ్యాయ తుభ్యమ్ |
 నమో వేదవేద్యాయ చాద్యాయ పుంసే
         నమః సున్దరాయేన్దిరావల్లభాయ || ౧౩ ||

నమో విశ్వకర్త్రే నమో విశ్వహర్త్రే
         నమో విశ్వభోక్త్రే నమో విశ్వమాత్రే |
 నమో విశ్వనేత్రే నమో విశ్వజేత్రే
         నమో విశ్వపిత్రే నమో విశ్వమాత్రే || ౧౪ ||

శిలాపి త్వదన్ఘ్రిక్షమాసఙ్గిరేణు
       ప్రసాదాద్ధి చైతన్యమాధత్త రామ |
 నరస్త్వత్పదద్వన్ద్వసేవావిధానా
       త్సుచైతన్యమేతేతి కిం చిత్రమద్య || ౧౫ ||


 పవిత్రం చరిత్రం విచిత్రం త్వదీయం
       నరా యే స్మరన్త్యన్వహం రామచన్ద్ర |
 భవన్తం భవాన్తం భరన్తం భజన్తో
       లభన్తే కృతాన్తం న పశ్యన్త్యతోఽన్తే || ౧౬ ||

స పుణ్యః స గణ్యః శరణ్యో మమాయం
       నరో వేద యో దేవచూడామణిం త్వామ్ |
 సదాకారమేకం చిదానన్దరూపం
       మనోవాగగమ్యం పరన్ధామ రామ || ౧౭ ||

ప్రచణ్డప్రతాపప్రభావాభిభూత
       ప్రభూతారివీర ప్రభో రామచన్ద్ర |
 బలం తే కథం వర్ణ్యతేఽతీవ బాల్యే
       యతోఽఖణ్డి చణ్డీశకోదణ్డదణ్డః || ౧౮ ||


 దశగ్రీవముగ్రం సపుత్రం సమిత్రం
        సరిద్దుర్గమధ్యస్థరక్షోగణేశమ్ |
 భవన్తం వినా రామ వీరో నరో వా
        ఽసురో వాఽమరో వా జయేత్కస్త్రిలోక్యామ్ || ౧౯ ||


 సదా రామ రామేతి రామామృతం తే
       సదారామమానన్దనిష్యన్దకన్దమ్ |
 పిబన్తం నమన్తం సుదన్తం హసన్తం
        హనూమన్తమన్తర్భజే తం నితాన్తమ్ || ౨౦ ||



 సదా రామ రామేతి రామామృతమ్ తే
        సదారామమానన్దనిష్యన్దకన్దమ్ |
 పిబన్నన్వహం నన్వహం నైవ మృత్యో
        ర్బిభేమి ప్రసాదాదసాదాత్తవైవ || ౨౧ ||


 అసీతాసమేతైరకోదణ్డభూశై
        రసౌమిత్రివన్ద్యైరచణ్డప్రతాపైః |
 అలఙ్కేశకాలైరసుగ్రీవమిత్రై
        రరామాభిధేయైరలమ్ దేవతైర్నః || ౨౨ ||


 అవీరాసనస్థైరచిన్ముద్రికాఢ్యై
         రభక్తాఞ్జనేయాదితత్త్వప్రకాశైః |
 అమన్దారమూలైరమన్దారమాలై
         రరామాభిధేయైరలమ్ దేవతైర్నః || ౨౩ ||

అసిన్ధుప్రకోపైరవన్ద్యప్రతాపై
          రబన్ధుప్రయాణైరమన్దస్మితాఢ్యైః |
 అదణ్డప్రవాసైరఖణ్డప్రబోధై
           రరామభిదేయైరలమ్ దేవతైర్నః || ౨౪ ||


హరే రామ సీతాపతే రావణారే
          ఖరారే మురారేఽసురారే పరేతి |
 లపన్తం నయన్తం సదాకాలమేవ
          సమాలోకయాలోకయాశేషబన్ధో || ౨౫ ||

నమస్తే సుమిత్రాసుపుత్రాభివన్ద్య
        నమస్తే సదా కైకయీనన్దనేడ్య |
 నమస్తే సదా వానరాధీశవన్ద్య
        నమస్తే నమస్తే సదా రామచన్ద్ర || ౨౬ ||

ప్రసీద ప్రసీద ప్రచణ్డప్రతాప
        ప్రసీద ప్రసీద ప్రచణ్డారికాల |
 ప్రసీద ప్రసీద ప్రపన్నానుకమ్పిన్
        ప్రసీద ప్రసీద ప్రభో రామచన్ద్ర || ౨౭ ||



 || ఇతి శ్రీశఙ్కరాచార్యవిరచితమ్
                శ్రీరామభుజఙ్గప్రయాతస్తోత్రమ్  సమ్పూర్ణమ||



 || ఓం శ్రీసీతాలక్ష్మణభరతశతృఘ్నహనూమత్సమేత
      శ్రీరామచన్ద్రపరబ్రహ్మార్పణమస్తు ||

Sri Rama Pratah Smaranam

శ్రీరామప్రాతఃస్మరణమ్

ప్రాతః స్మరామి రఘునాథముఖారవిన్దం
     మన్దస్మితం మధురభాషి విశాలభాలమ్ |
కర్ణావలమ్బిచలకుణ్డలశోభిగణ్డం
     కర్ణాన్తదీర్ఘనయనం నయనాభిరామమ్ || ౧||

ప్రాతర్భజామి రఘునాథకరారవిన్దం
     రక్షోగణాయ భయదం వరదం నిజేభ్యః |
యద్రాజసంసది విభజ్య మహేశచాపం
     సీతాకరగ్రహణమఙ్గలమాప సద్యః || ౨||

ప్రాతర్నమామి రఘునాథపదారవిన్దం
     వజ్రాఙ్కుశాదిశుభరేఖి సుఖావహం మే |
యోగీన్ద్రమానసమధువ్రతసేవ్యమానం
     శాపాపహం సపది గౌతమధర్మపత్న్యాః || ౩||

ప్రాతర్వదామి వచసా రఘునాథ నామ
     వాగ్దోషహారి సకలం శమలం నిహన్తి |
యత్పార్వతీ స్వపతినా సహ భోక్తుకామా
     ప్రీత్యా సహస్రహరినామసమం జజాప || ౪||

ప్రాతః శ్రయే శ్రుతినుతాం రఘునాథమూర్తిం
     నీలామ్బుజోత్పలసితేతరరత్ననీలామ్ |
ఆముక్తమౌక్తికవిశేషవిభూషణాఢ్యాం
     ధ్యేయాం సమస్తమునిభిర్జనముక్తిహేతుమ్ || ౫||

యః శ్లోకపఞ్చకమిదం ప్రయతః పఠేద్ధి
     నిత్యం ప్రభాతసమయే పురుషః ప్రబుద్ధః |
శ్రీరామకిఙ్కరజనేషు స ఏవ ముఖ్యో
     భూత్వా ప్రయాతి హరిలోకమనన్యలభ్యమ్ ||

|| ఇతి శ్రీరామ ప్రాతఃస్మరణమ్ ||

Sri Rama Hridayam

శ్రీ రామహృదయమ్

శ్రీ గణేశాయ నమః | శ్రీ మహాదేవ ఉవాచ |

తతో రామః స్వయం ప్రాహ హనుమన్తముపస్థితమ్ |
శ్రృణు యత్వం ప్రవక్ష్యామి హ్యాత్మానాత్మపరాత్మనామ్ || ౧||

ఆకాశస్య యథా భేదస్త్రివిధో దృశ్యతే మహాన్ |
జలాశయే మహాకాశస్తదవచ్ఛిన్న ఏవ హి |
ప్రతిబిమ్బాఖ్యమపరం దృశ్యతే త్రివిధం నభః || ౨||

బుద్ధ్యవచ్ఛిన్నచైతన్యమేకం పూర్ణమథాపరమ్ |
ఆభాసస్త్వపరం బిమ్బభూతమేవం త్రిధా చితిః || ౩||

సాభాసబుద్ధేః కర్తృత్వమవిచ్ఛిన్నేఽవికారిణి |
సాక్షిణ్యారోప్యతే భ్రాన్త్యా జీవత్వం చ తథాఽబుధైః || ౪||

ఆభాసస్తు మృషాబుద్ధిరవిద్యాకార్యముచ్యతే |
అవిచ్ఛిన్నం తు తద్బ్రహ్మ విచ్ఛేదస్తు వికల్పితః || ౫||

అవిచ్ఛిన్నస్య పూర్ణేన ఏకత్వం ప్రతిపద్యతే |
తత్వమస్యాదివాక్యైశ్చ సాభాసస్యాహమస్తథా || ౬||

ఐక్యజ్ఞానం యదోత్పన్నం మహావాక్యేన చాత్మనోః |
తదాఽవిద్యా స్వకార్యైశ్చ నశ్యత్యేవ న సంశయః || ౭||

ఏతద్విజ్ఞాయ మద్భక్తో మద్భావాయోపపద్యతే
మద్భక్తివిముఖానాం హి శాస్త్రగర్తేషు ముహ్యతామ్ |
న జ్ఞానం న చ మోక్షః స్యాత్తేషాం జన్మశతైరపి || ౮||

ఇదం రహస్యం హృదయం మమాత్మనో మయైవ సాక్షాత్కథితం తవానఘ |
మద్భక్తిహీనాయ శఠాయ న త్వయా దాతవ్యమైన్ద్రాదపి రాజ్యతోఽధికమ్ || ౯||

|| శ్రీమదధ్యాత్మరామాయణే బాలకాణ్డే శ్రీరామహృదయం సమ్పూర్ణమ్ ||

Shri Rama Sahasra Nama stotram

రామ సహస్రనామస్తోత్ర


శ్రీరాఘవం దశరథాత్మజమప్రమేయం
సీతాపతిం రఘుకులాన్వయరత్నదీపం |
ఆజానుబాహుమరవిందదలాయతాక్షం
రామం నిశాచరవినాశకరం నమామి ||
వైదేహీసహితం సురద్రుమతలే హైమే మహామండపే
మధ్యే పుష్పకమాసనే మణిమయే వీరాసనే సుస్థితం |
అగ్రే వాచయతి ప్రభంజనసుతే తత్త్వం మునిభ్యః పరం
వ్యాఖ్యాంతం భరతాదిభిః పరివృతం రామం భజే శ్యామలం ||
శ్రీరామో రామభద్రశ్చ రామచంద్రశ్చ శాశ్వతః |
రాజీవలోచనః శ్రీమాన్ రాజేంద్రో రఘుపుంగవః ||  1||
జానకీవల్లభో జైత్రో జితామిత్రో జనార్దనః |
విశ్వామిత్రప్రియో దాంతః శత్రుజిచ్ఛత్రుతాపనః ||  2||
వాలిప్రమథనో వాగ్మీ సత్యవాక్ సత్యవిక్రమః |
సత్యవ్రతో వ్రతధరః సదా హనుమదాశ్రితః ||  3||
కౌసలేయః ఖరధ్వంసీ విరాధవధపండితః |
విభీషణపరిత్రాతా హరకోదండఖండనః ||  4||
సప్తతాలప్రభేత్తా చ దశగ్రీవశిరోహరః |
జామదగ్న్యమహాదర్పదలనస్తాటకాంతకః ||  5||
వేదాంతసారో వేదాత్మా భవరోగస్య భేషజం |
దూషణత్రిశిరో హంతా త్రిమూర్తిస్త్రిగుణాత్మకః ||  6||
త్రివిక్రమస్త్రిలోకాత్మా పుణ్యచారిత్రకీర్తనః |
త్రిలోకరక్షకో ధన్వీ దండకారణ్యపావనః ||  7||
అహల్యాశాపశమనః పితృభక్తో వరప్రదః |
జితేంద్రియో జితక్రోధో జితామిత్రో జగద్గురుః ||  8||
ఋక్షవానరసంఘాతీ చిత్రకూటసమాశ్రయః |
జయంతత్రాణవరదః సుమిత్రాపుత్రసేవితః ||  9||
సర్వదేవాదిదేవశ్చ మృతవానరజీవనః |
మాయామారీచహంతా చ మహాదేవో మహాభుజః ||  10||
సర్వదేవస్తుతః సౌమ్యో బ్రహ్మణ్యో మునిసంస్తుతః |
మహాయోగీ మహోదారః సుగ్రీవేప్సితరాజ్యదః ||  11||
సర్వపుణ్యాధికఫలః స్మృతసర్వాఘనాశనః |
ఆదిదేవో మహాదేవో మహాపూరుష ఏవ చ ||  12||
పుణ్యోదయో దయాసారః పురాణపురుషోత్తమః |
స్మితవక్త్రో మితాభాషీ పూర్వభాషీ చ రాఘవః ||  13||
అనంతగుణగంభీరో ధీరోదాత్తగుణోత్తమః |
మాయామానుషచారిత్రో మహాదేవాదిపూజితః ||  14||
సేతుకృజ్జితవారీశః సర్వతీర్థమయో హరిః |
శ్యామాంగః సుందరః శూరః పీతవాసా ధనుర్ధరః ||  15||
సర్వయజ్ఞాధిపో యజ్వా జరామరణవర్జితః |
శివలింగప్రతిష్ఠాతా సర్వావగుణవర్జితః ||  16||
పరమాత్మా పరం బ్రహ్మ సచ్చిదానందవిగ్రహః |
పరం జ్యోతిః పరంధామ పరాకాశః పరాత్పరః ||  17||
పరేశః పారగః పారః సర్వదేవాత్మకః పరః ||
||  ఇతి శ్రీరామాష్టోత్తరశతనామస్తోత్రం సంపూర్ణం ||
రాజీవలోచనః శ్రీమాన్ శ్రీరామో రఘుపుంగవః |
రామభద్రః సదాచారో రాజేంద్రో జానకీపతిః ||  1||
అగ్రగణ్యో వరేణ్యశ్చ వరదః పరమేశ్వరః |
జనార్దనో జితామిత్రః పరార్థైకప్రయోజనః ||  2||
విశ్వామిత్రప్రియో దాంతశ్శత్రుజిచ్ఛత్రుతాపనః |
సర్వజ్ఞః సర్వదేవాదిః శరణ్యో వాలిమర్దనః ||  3||
జ్ఞానభావ్యోఽపరిచ్ఛేద్యోవాగ్మీసత్యవ్రతః శుచిః |
జ్ఞానగమ్యో దృఢప్రజ్ఞః ఖరధ్వంసీ ప్రతాపవాన్ ||  4||
ద్యుతిమానాత్మవాన్ వీరో జితక్రోధోఽరిమర్దనః |
విశ్వరూపో విశాలాక్షః ప్రభుః పరివృఢో దృఢః ||  5||
ఈశః ఖడ్గధరః శ్రీమాన్ కౌసలేయోఽనసూయకః |
విపులాంసో మహోరస్కః పరమేష్ఠీ పరాయణః ||  6||
సత్యవ్రతః సత్యసంధో గురుః పరమధార్మికః |
లోకజ్ఞో లోకవంద్యశ్చ లోకాత్మాలోకకృత్పరః ||  7||
అనాదిర్భగవాన్ సేవ్యో జితమాయో రఘూద్వహః |
రామో దయాకరో దక్షః సర్వజ్ఞః సర్వపావనః ||  8||
బ్రహ్మణ్యో నీతిమాన్ గోప్తా సర్వదేవమయో హరిః |
సుందరః పీతవాసాశ్చ సూత్రకారః పురాతనః ||  9||
సౌమ్యో మహర్షిః కోదండీ సర్వజ్ఞః సర్వకోవిదః |
కవిః సుగ్రీవవరదః సర్వపుణ్యాధికప్రదః ||  10||
భవ్యో జితారిషడ్వర్గో మహోదరోఽఘనాశనః |
సుకీర్తిరాదిపురుషః కాంతః పుణ్యకృతాగమః ||  11||
అకల్మషశ్చతుర్బాహుః సర్వావాసో దురాసదః |
స్మితభాషీ నివృత్తాత్మా స్మృతిమాన్ వీర్యవాన్ ప్రభుః ||  12||
ధీరో దాంతో ఘనశ్యామః సర్వాయుధవిశారదః |
అధ్యాత్మయోగనిలయః సుమనా లక్ష్మణాగ్రజః ||  13||
సర్వతీర్థమయశ్శూరః సర్వయజ్ఞఫలప్రదః |
యజ్ఞస్వరూపీ యజ్ఞేశో జరామరణవర్జితః ||  14||
వర్ణాశ్రమకరో వర్ణీ శత్రుజిత్ పురుషోత్తమః |
విభీషణప్రతిష్ఠాతా పరమాత్మా పరాత్పరః ||  15||
ప్రమాణభూతో దుర్జ్ఞేయః పూర్ణః పరపురంజయః |
అనంతదృష్టిరానందో ధనుర్వేదో ధనుర్ధరః ||  16||
గుణాకరో గుణశ్రేష్ఠః సచ్చిదానందవిగ్రహః |
అభివంద్యో మహాకాయో విశ్వకర్మా విశారదః ||  17||
వినీతాత్మా వీతరాగః తపస్వీశో జనేశ్వరః |
కల్యాణప్రకృతిః కల్పః సర్వేశః సర్వకామదః ||  18||
అక్షయః పురుషః సాక్షీ కేశవః పురుషోత్తమః |
లోకాధ్యక్షో మహామాయో విభీషణవరప్రదః ||  19||
ఆనందవిగ్రహో జ్యోతిర్హనుమత్ప్ర్భురవ్యయః |
భ్రాజిష్ణుః సహనో భోక్తా సత్యవాదీ బహుశ్రుతః ||  20||
సుఖదః కారణం కర్తా భవబంధవిమోచనః |
దేవచూడామణిర్నేతా బ్రహ్మణ్యో బ్రహ్మవర్ధనః ||  21||
సంసారోత్తారకో రామః సర్వదుఃఖవిమోక్షకృత్ |
విద్వత్తమో విశ్వకర్తా విశ్వహర్తా చ విశ్వకృత్ ||  22||
నిత్యోనియతకల్యాణః సీతాశోకవినాశకృత్ |
కాకుత్స్థః పుండరీకాక్షో విశ్వామిత్రభయాపహః ||  23||
మారీచమథనో రామో విరాధవధపండితః |
దుస్స్వప్ననాశనో రమ్యః కిరీటీ త్రిదశాధిపః ||  24||
మహాధనుర్మహాకాయో భీమో భీమపరాక్రమః |
తత్త్వస్వరూపీ తత్త్వజ్ఞః తత్త్వవాదీ సువిక్రమః ||  25||
భూతాత్మా భూతకృత్స్వామీ కాలజ్ఞానీ మహాపటుః |
అనిర్విణ్ణో గుణగ్రాహీ నిష్కలంకః కలంకహా ||  26||
స్వభావభద్రశ్శత్రుఘ్నః కేశవః స్థాణురీశ్వరః |
భూతాదిః శంభురాదిత్యః స్థవిష్ఠశ్శాశ్వతోధ్రువః ||  27||
కవచీ కుండలీ చక్రీ ఖడ్గీ భక్తజనప్రియః |
అమృత్యుర్జన్మరహితః సర్వజిత్సర్వగోచరః ||  28||
అనుత్తమోఽప్రమేయాత్మా సర్వాదిర్గుణసాగరః |
సమః సమాత్మా సమగో జటాముకుటమండితః ||  29||
అజేయః సర్వభూతాత్మా విష్వక్సేనో మహాతపాః |
లోకాధ్యక్షో మహాబాహురమృతో వేదవిత్తమః ||  30||
సహిష్ణుః సద్గతిః శాస్తా విశ్వయోనిర్మహాద్యుతిః |
అతీంద్ర ఊర్జితః ప్రాంశురుపేంద్రో వామనో బలీ ||  31||
ధనుర్వేదో విధాతా చ బ్రహ్మా విష్ణుశ్చ శంకరః |
హంసో మరీచిర్గోవిందో రత్నగర్భో మహామతిః ||  32||
వ్యాసో వాచస్పతిః సర్వదర్పితాసురమర్దనః |
జానకీవల్లభః పూజ్యః ప్రకటః ప్రీతివర్ధనః ||  33||
సంభవోఽతీంద్రియోవేద్యోఽనిర్దేశోజాంబవత్ప్రభుః |
మదనో మథనో వ్యాపీ విశ్వరూపో నిరంజనః ||  34||
నారాయణోఽగ్రణీః సాధుర్జటాయుప్రీతివర్ధనః |
నైకరూపో జగన్నాథః సురకార్యహితః స్వభూః ||  35||
జితక్రోధో జితారాతిః ప్లవగాధిపరాజ్యదః |
వసుదః సుభుజో నైకమాయో భవ్యప్రమోదనః ||  36||
చండాంశుః సిద్ధిదః కల్పః శరణాగతవత్సలః |
అగదో రోగహర్తా చ మంత్రజ్ఞో మంత్రభావనః ||  37||
సౌమిత్రివత్సలో ధుర్యో వ్యక్తావ్యక్తస్వరూపధృక్ |
వసిష్ఠో గ్రామణీః శ్రీమాననుకూలః ప్రియంవదః ||  38||
అతులః సాత్త్వికో ధీరః శరాసనవిశారదః |
జ్యేష్ఠః సర్వగుణోపేతః శక్తిమాంస్తాటకాంతకః ||  39||
వైకుంఠః ప్రాణినాం ప్రాణః కమఠః కమలాపతిః |
గోవర్ధనధరో మత్స్యరూపః కారుణ్యసాగరః ||  40||
కుంభకర్ణప్రభేత్తా చ గోపిగోపాలసంవృతః |
మాయావీ వ్యాపకో వ్యాపీ రైణుకేయబలాపహః ||  41||
పినాకమథనో వంద్యః సమర్థో గరుడధ్వజః |
లోకత్రయాశ్రయో లోకచరితో భరతాగ్రజః ||  42||
శ్రీధరః సద్గతిర్లోకసాక్షీ నారాయణో బుధః |
మనోవేగీ మనోరూపీ పూర్ణః పురుషపుంగవః ||  43||
యదుశ్రేష్ఠో యదుపతిర్భూతావాసః సువిక్రమః |
తేజోధరో ధరాధారశ్చతుర్మూర్తిర్మహానిధిః ||  44||
చాణూరమర్దనో దివ్యశ్శాంతో భరతవందితః |
శబ్దాతిగో గభీరాత్మా కోమలాంగః ప్రజాగరః ||  45||
లోకగర్భశ్శేషశాయీ క్షీరాబ్ధినిలయోఽమలః |
ఆత్మయోనిరదీనాత్మా సహస్రాక్షః సహస్రపాత్ ||  46||
అమృతాంశుర్మహాగర్భో నివృత్తవిషయస్పృహః |
త్రికాలజ్ఞో మునిస్సాక్షీ విహాయసగతిః కృతీ ||  47||
పర్జన్యః కుముదో భూతావాసః కమలలోచనః |
శ్రీవత్సవక్షాః శ్రీవాసో వీరహా లక్ష్మణాగ్రజః ||  48||
లోకాభిరామో లోకారిమర్దనః సేవకప్రియః |
సనాతనతమో మేఘశ్యామలో రాక్షసాంతకృత్ ||  49||
దివ్యాయుధధరః శ్రీమానప్రమేయో జితేంద్రియః |
భూదేవవంద్యో జనకప్రియకృత్ప్రపితామహః ||  50||
ఉత్తమః సాత్వికః సత్యః సత్యసంధస్త్రివిక్రమః |
సువ్రతః సులభః సూక్ష్మః సుఘోషః సుఖదః సుధీః ||  51||
దామోదరోఽచ్యుతశ్శార్ంగీ వామనో మధురాధిపః |
దేవకీనందనః శౌరిః శూరః కైటభమర్దనః ||  52||
సప్తతాలప్రభేత్తా చ మిత్రవంశప్రవర్ధనః |
కాలస్వరూపీ కాలాత్మాకాలః కల్యాణదఃకవిః
సంవత్సర ఋతుః పక్షో హ్యయనం దివసో యుగః ||  53||
స్తవ్యో వివిక్తో నిర్లేపః సర్వవ్యాపీ నిరాకులః |
అనాదినిధనః సర్వలోకపూజ్యో నిరామయః ||  54||
రసో రసజ్ఞః సారజ్ఞో లోకసారో రసాత్మకః |
సర్వదుఃఖాతిగో విద్యారాశిః పరమగోచరః ||  55||
శేషో విశేషో విగతకల్మషో రఘునాయకః |
వర్ణశ్రేష్ఠో వర్ణవాహ్యో వర్ణ్యో వర్ణ్యగుణోజ్జ్వలః ||  56||
కర్మసాక్ష్యమరశ్రేష్ఠో దేవదేవః సుఖప్రదః |
దేవాధిదేవో దేవర్షిర్దేవాసురనమస్కృతః ||  57||
సర్వదేవమయశ్చక్రీ శార్ంగపాణీ రఘూత్తమః |
మనో బుద్ధిరహంకారః ప్రకృతిః పురుషోఽవ్యయః ||  58||
అహల్యాపావనః స్వామీ పితృభక్తో వరప్రదః |
న్యాయో న్యాయీ నయీ శ్రీమాన్నయో నగధరోధ్రువః ||  59||
లక్ష్మీవిశ్వంభరాభర్తా దేవేంద్రో బలిమర్దనః |
వాణారిమర్దనో యజ్వానుత్తమో మునిసేవితః ||  60||
దేవాగ్రణీః శివధ్యానతత్పరః పరమః పరః |
సామగేయః ప్రియోఽక్రూరః పుణ్యకీర్తిస్సులోచనః ||  61||
పుణ్యః పుణ్యాధికః పూర్వః పూర్ణః పూరయితా రవిః |
జటిలః కల్మషధ్వాంతప్రభంజనవిభావసుః ||  62||
అవ్యక్తలక్షణోఽవ్యక్తో దశాస్యద్విపకేసరీ |
కలానిధిః కలానాథో కమలానందవర్ధనః ||  63||
జయీ జితారిః సర్వాదిః శమనో భవభంజనః |
అలంకరిష్ణురచలో రోచిష్ణుర్విక్రమోత్తమః ||  64||
ఆశుః శబ్దపతిః శబ్దాగోచరో రంజనో రఘుః |
నిశ్శబ్దః ప్రణవో మాలీ స్థూలః సూక్ష్మో విలక్షణః ||  65||
ఆత్మయోనిరయోనిశ్చ సప్తజిహ్వః సహస్రపాత్ |
సనాతనతమస్స్రగ్వీ పేశలో జవినాం వరః ||  66||
శక్తిమాఞ్శంఖభౄన్నాథః గదాపద్మరథాంగభృత్ |
నిరోహో నిర్వికల్పశ్చ చిద్రూపో వీతసాధ్వసః ||  67||
శతాననః సహస్రాక్షః శతమూర్తిర్ధనప్రభః |
హృత్పుండరీకశయనః కఠినో ద్రవ ఏవ చ ||  68||
ఉగ్రో గ్రహపతిః శ్రీమాన్ సమర్థోఽనర్థనాశనః |
అధర్మశత్రూ రక్షోఘ్నః పురుహూతః పురుష్టుతః ||  69||
బ్రహ్మగర్భో బృహద్గర్భో ధర్మధేనుర్ధనాగమః |
హిరణ్యగర్భోజ్యోతిష్మాన్ సులలాటః సువిక్రమః ||  70||
శివపూజారతః శ్రీమాన్ భవానీప్రియకృద్వశీ |
నరో నారాయణః శ్యామః కపర్దీనీలలోహితః ||  71||
రుద్రః పశుపతిః స్థాణుర్విశ్వామిత్రో ద్విజేశ్వరః |
మాతామహోమాతరిశ్వావిరించోవిష్టరశ్రవాః ||  72||
అక్షోభ్యః సర్వభూతానాం చండః సత్యపరాక్రమః |
వాలఖిల్యో మహాకల్పః కల్పవృక్షః కలాధరః ||  73||
నిదాఘస్తపనోఽమోఘః శ్లక్ష్ణః పరబలాపహృత్ |
కబంధమథనో దివ్యః కంబుగ్రీవశివప్రియః ||  74||
శంఖోఽనిలః సునిష్పన్నః సులభః శిశిరాత్మకః |
అసంసృష్టోఽతిథిః శూరః ప్రమాథీ పాపనాశకృత్ ||  75||
వసుశ్రవాః కవ్యవాహః ప్రతప్తో విశ్వభోజనః |
రామోనీలోత్పలశ్యామోజ్ఞానస్కంధోమహాద్యుతిః ||  76||
పవిత్రపాదః పాపారిర్మణిపూరో నభోగతిః |
ఉత్తారణో దుష్కృతిహా దుర్ధర్షో దుస్సహోఽభయః ||  77||
అమృతేశోఽమృతవపుర్ధర్మీ ధర్మః కృపాకరః |
భర్గో వివస్వానాదిత్యో యోగాచార్యో దివస్పతిః ||  78||
ఉదారకీర్తిరుద్యోగీ వాఙ్మయః సదసన్మయః |
నక్షత్రమాలీ నాకేశః స్వాధిష్ఠానః షడాశ్రయః ||  79||
చతుర్వర్గఫలో వర్ణీ శక్తిత్రయఫలం నిధిః |
నిధానగర్భో నిర్వ్యాజో గిరీశో వ్యాలమర్దనః ||  80||
శ్రీవల్లభః శివారంభః శాంతిర్భద్రః సమంజసః |
భూశయో భూతికృద్భూతిర్భూషణో భూతవాహనః ||  81||
అకాయో భక్తకాయస్థః కాలజ్ఞానీ మహావటుః |
పరార్థవృత్తిరచలో వివిక్తః శ్రుతిసాగరః ||  82||
స్వభావభద్రో మధ్యస్థః సంసారభయనాశనః |
వేద్యో వైద్యో వియద్గోప్తా సర్వామరమునీశ్వరః ||  83||
సురేంద్రః కరణం కర్మ కర్మకృత్కర్మ్యధోక్షజః |
ధ్యేయో ధుర్యో ధరాధీశః సంకల్పః శర్వరీపతిః ||  84||
పరమార్థగురుర్వృద్ధః శుచిరాశ్రితవత్సలః |
విష్ణుర్జిష్ణుర్విభుర్వంద్యో యజ్ఞేశో యజ్ఞపాలకః ||  85||
ప్రభవిష్ణుర్గ్రసిష్ణుశ్చ లోకాత్మా లోకభావనః |
కేశవః కేశిహా కావ్యః కవిః కారణకారణం ||  86||
కాలకర్తా కాలశేషో వాసుదేవః పురుష్టుతః |
ఆదికర్తా వరాహశ్చ మాధవో మధుసూదనః ||  87||
నారాయణో నరో హంసో విష్వక్సేనో జనార్దనః |
విశ్వకర్తా మహాయజ్ఞో జ్యోతిష్మాన్ పురుషోత్తమః ||  88||
వైకుంఠః పుండరీకాక్షః కృష్ణః సూర్యః సురార్చితః |
నారసింహో మహాభీమో వక్రదంష్ట్రో నఖాయుధః ||  89||
ఆదిదేవో జగత్కర్తా యోగీశో గరుడధ్వజః |
గోవిందోగోపతిర్గోప్తా భూపతిర్భువనేశ్వరః ||  90||
పద్మనాభో హృషీకేశో ధాతా దామోదరః ప్రభుః |
త్రివిక్రమస్త్రిలోకేశో బ్రహ్మేశః ప్రీతివర్ధనః ||  91||
వామనో దుష్టదమనో గోవిందో గోపవల్లభః |
భక్తప్రియోఽచ్యుతః సత్యః సత్యకీర్తిర్ధృతిః స్మృతిః ||  92||
కారుణ్యం కరుణో వ్యాసః పాపహా శాంతివర్ధనః |
సంన్యాసీ శాస్త్రతత్వజ్ఞో మందరాద్రినికేతనః ||  93||
బదరీనిలయః శాంతస్తపస్వీ వైద్యుతప్రభః |
భూతావాసో గుహావాసః శ్రీనివాసః శ్రియః పతిః ||  94||
తపోవాసో ముదావాసః సత్యవాసః సనాతనః |
పురుషః పుష్కరః పుణ్యః పుష్కరాక్షో మహేశ్వరః ||  95||
పూర్ణమూర్తిః పురాణజ్ఞః పుణ్యదః ప్రీతివర్ధనః |
శంఖీ చక్రీ గదీ శార్ంగీ లాంగలీ ముసలీ హలీ ||  96||
కిరీటీ కుండలీ హారీ మేఖలీ కవచీ ధ్వజీ |
యోద్ధా జేతా మహావీర్యః శత్రుజిచ్ఛత్రుతాపనః ||  97||
శాస్తా శాస్త్రకరః శాస్త్రం శంకరః శంకరస్తుతః |
సారథిః సాత్త్వికః స్వామీ సామవేదప్రియః సమః ||  98||
పవనః సంహతః శక్తిః సంపూర్ణాంగః సమృద్ధిమాన్ |
స్వర్గదః కామదః శ్రీదః కీర్తిదోఽకీర్తినాశనః ||  99||
మోక్షదః పుండరీకాక్షః క్షీరాబ్ధికృతకేతనః |
సర్వాత్మాసర్వలోకేశః ప్రేరకః పాపనాశనః ||  100||
సర్వవ్యాపీ జగన్నాథః సర్వలోకమహేశ్వరః |
సర్గస్థిత్యంతకృద్దేవః సర్వలోకసుఖావహః ||  101||
అక్షయ్యః శాశ్వతోఽనంతః క్షయవృద్ధివివర్జితః |
నిర్లేపో నిర్గుణః సూక్ష్మో నిర్వికారో నిరంజనః ||  102||
సర్వోపాధివినిర్ముక్తః సత్తామాత్రవ్యవస్థితః |
అధికారీ విభుర్నిత్యః పరమాత్మా సనాతనః ||  103||
అచలో నిర్మలో వ్యాపీ నిత్యతృప్తో నిరాశ్రయః |
శ్యామో యువా లోహితాక్షో దీప్తాస్యో మితభాషణః ||  104||
ఆజానుబాహుః సుముఖః సింహస్కంధో మహాభుజః |
సత్యవాన్ గుణసంపన్నః స్వయంతేజాః సుదీప్తిమాన్ ||  105||
కాలాత్మా భగవాన్ కాలః కాలచక్రప్రవర్తకః |
నారాయణః పరంజ్యోతిః పరమాత్మా సనాతనః ||  106||
విశ్వసృడ్విశ్వగోప్తా చ విశ్వభోక్తా చ శాశ్వతః |
విశ్వేశ్వరో విశ్వమూర్తిర్విశ్వాత్మా విశ్వభావనః ||  107||
సర్వభూతసుహృచ్ఛాంతః సర్వభూతానుకంపనః |
సర్వేశ్వరేశ్వరః సర్వః శ్రీమానాశ్రితవత్సలః ||  108||
సర్వగః సర్వభూతేశః సర్వభూతాశయస్థితః |
అభ్యంతరస్థస్తమసశ్ఛేత్తా నారాయణః పరః ||  109||
అనాదినిధనః స్రష్టా ప్రజాపతిపతిర్హరిః |
నరసింహో హృషీకేశః సర్వాత్మా సర్వదృగ్వశీ ||  110||
జగతస్తస్థుషశ్చైవ ప్రభుర్నేతా సనాతనః |
కర్తా ధాతా విధాతా చ సర్వేషాం ప్రభురీశ్వరః ||  111||
సహస్రమూర్తిర్విశ్వాత్మా విష్ణుర్విశ్వదృగవ్యయః |
పురాణపురుషః స్రష్టా సహస్రాక్షః సహస్రపాత్ ||  112||
తత్త్వం నారాయణో విష్ణుర్వాసుదేవః సనాతనః |
పరమాత్మా పరం బ్రహ్మ సచ్చిదానందవిగ్రహః ||  113||
పరంజ్యోతిః పరంధామః పరాకాశః పరాత్పరః |
అచ్యుతః పురుషః కృష్ణః శాశ్వతః శివ ఈశ్వరః ||  114||
నిత్యః సర్వగతః స్థాణురుగ్రః సాక్షీ ప్రజాపతిః |
హిరణ్యగర్భః సవితా లోకకృల్లోకభృద్విభుః ||  115||
రామః శ్రీమాన్ మహావిష్ణుర్జిష్ణుర్దేవహితావహః |
తత్వాత్మా తారకం బ్రహ్మ శాశ్వతః సర్వసిద్ధిదః ||  116||
అకారవాచ్యోభగవాన్ శ్రీర్భూలీలాపతిః పుమాన్ |
సర్వలోకేశ్వరః శ్రీమాన్ సర్వజ్ఞః సర్వతోముఖః ||  117||
స్వామీ సుశీలః సులభః సర్వజ్ఞః సర్వశక్తిమాన్ |
నిత్యః సంపూర్ణకామశ్చ నైసర్గికసుహృత్సుఖీ ||  118||
కృపాపీయూషజలధిశ్శరణ్యః సర్వదేహినాం |
శ్రీమాన్నారాయణః స్వామీ జగతాం పతిరీశ్వరః ||  119||
శ్రీశః శరణ్యో భూతానాం సంశ్రితాభీష్టదాయకః |
అనంతః శ్రీపతీ రామో గుణభృన్నిర్గుణో మహాన్ ||  120||
||  ఇతి శ్రీరామసహస్రనామస్తోత్రం సంపూర్ణం ||

Sri Rama ashtottara satanama stotram

శ్రీ రామ అష్టోత్తరనామ స్తోత్రం

శ్రీరామో రామభద్రశ్చ రామచంద్రశ్చ శాశ్వతః |
రాజీవలోచనః శ్రీమాన్రాజేంద్రో రఘుపుంగవః || ౧ ||
జానకీవల్లభో జైత్రో జితామిత్రో జనార్దనః |
విశ్వామిత్రప్రియో దాంతః శరణత్రాణతత్పరః || ౨ ||
వాలిప్రమథనో వాగ్మీ సత్యవాక్సత్యవిక్రమః |
సత్యవ్రతో వ్రతధరః సదాహనుమదాశ్రితః || ౩ ||
కౌసలేయః ఖరధ్వంసీ విరాధవధపండితః |
విభీషణపరిత్రాతా హరకోదండఖండనః || ౪ ||
సప్తతాలప్రభేత్తా చ దశగ్రీవశిరోహరః |
జామదగ్న్యమహాదర్పదలనస్తాటకాంతకః || ౫ ||
వేదాంతసారో వేదాత్మా భవరోగస్య భేషజమ్ |
దూషణత్రిశిరోహంతా త్రిమూర్తిస్త్రిగుణాత్మకః || ౬ ||
త్రివిక్రమస్త్రిలోకాత్మా పుణ్యచారిత్రకీర్తనః |
త్రిలోకరక్షకో ధన్వీ దండకారణ్యపావనః || ౭ ||
అహల్యాశాపశమనః పితృభక్తో వరప్రదః |
జితేంద్రియో జితక్రోధో జగన్మిత్రో జగద్గురుః || ౮ ||
ఋక్షవానరసంఘాతీ చిత్రకూటసమాశ్రయః |
జయంతత్రాణవరదః సుమిత్రాపుత్రసేవితః || ౯ ||
సర్వదేవాదిదేవశ్చ మృతవానరజీవనః |
మాయామారీచహంతా చ మహాదేవో మహాభుజః || ౧౦ ||
సర్వదేవస్తుతః సౌమ్యో బ్రహ్మణ్యో మునిసంస్తుతః |
మహాయోగీ మహోదారః సుగ్రీవేప్సితరాజ్యదః || ౧౧ ||
సర్వపుణ్యాధికఫలః స్మృతసర్వాఘనాశనః |
ఆదిపురుషః పరమపురుషో మహాపురుష ఏవ చ || ౧౨ ||
పుణ్యోదయో దయాసారః పురాణపురుషోత్తమః |
స్మితవక్త్రో మితాభాషీ పూర్వభాషీ చ రాఘవః || ౧౩ ||
అనంతగుణగంభీరో ధీరోదాత్తగుణోత్తమః |
మాయామానుషచారిత్రో మహాదేవాదిపూజితః || ౧౪ ||
సేతుకృజ్జితవారాశిః సర్వతీర్థమయో హరిః |
శ్యామాంగః సుందరః శూరః పీతవాసా ధనుర్ధరః || ౧౫ ||
సర్వయజ్ఞాధిపో యజ్వా జరామరణవర్జితః |
శివలింగప్రతిష్ఠాతా సర్వావగుణవర్జితః || ౧౬ ||
పరమాత్మా పరం బ్రహ్మ సచ్చిదానందవిగ్రహః |
పరంజ్యోతిః పరంధామ పరాకాశః పరాత్పరః
పరేశః పారగః పారః సర్వదేవాత్మకః పరః || ౧౭ ||

Sri Rama Raksha Stotram

శ్రీరామ రక్షాస్తోత్రం

ఓం అస్య శ్రీ రామరక్షా స్తోత్రమంత్రస్య, బుధకౌశిక ఋషిః, శ్రీ సీతారామ చంద్రోదేవతా,
అనుష్టుప్ ఛందః, సీతా శక్తిః, శ్రీమాన్ హనుమాన్ కీలకం,
శ్రీరామచంద్ర ప్రీత్యర్థే రామరక్షా స్తోత్రజపే వినియోగః

ధ్యానమ్
ధ్యాయేదాజానుబాహుం ధృతశర ధనుషం బద్ధ పద్మాసనస్థం
పీతం వాసోవసానం నవకమల దళస్పర్థి నేత్రం ప్రసన్నమ్
వామాంకారూఢ సీతాముఖ కమల మిలల్లోచనం నీరదాభం
నానాలంకార దీప్తం దధతమురు జటామండలం రామచంద్రమ్

స్తోత్రమ్
చరితం రఘునాథస్య శతకోటి ప్రవిస్తరమ్
ఏకైకమక్షరం పుంసాం మహాపాతక నాశనమ్

ధ్యాత్వా నీలోత్పల శ్యామం రామం రాజీవలోచనమ్
జానకీ లక్ష్మణోపేతం జటాముకుట మండితమ్

సాసితూణ ధనుర్బాణ పాణిం నక్తం చరాంతకమ్
స్వలీలయా జగత్రాతు మావిర్భూతమజం విభుమ్

రామరక్షాం పఠేత్ప్రాఙ్ఞః పాపఘ్నీం సర్వకామదామ్

అథ రామ రక్షా స్తోత్రం -

శిరో మే రాఘవః పాతుఫాలం దశరథాత్మజః

కౌసల్యేయో దృశౌపాతు విశ్వామిత్ర ప్రియః శృతీ
ఘ్రాణం పాతు మఖత్రాతా ముఖం సౌమిత్రివత్సలః

జిహ్వాం విద్యానిధిః పాతు కంఠం భరత వందితః
స్కంధౌ దివ్యాయుధః పాతు భుజౌ భగ్నేశకార్ముకః

కరౌ సీతాపతిః పాతు హృదయం జామదగ్న్యజిత్
మధ్యం పాతు ఖరధ్వంసీ నాభిం జాంబవదాశ్రయః

సుగ్రీవేశః కటీపాతు సక్థినీ హనుమత్-ప్రభుః
ఊరూ రఘూత్తమః పాతు రక్షకుల వినాశకృత్

జానునీ సేతుకృత్ పాతు జంఘే దశముఖాంతకః
పాదౌవిభీషణ శ్రీదఃపాతు రామో‌உఖిలం వపుః

ఫల శృతిః-
ఏతాం రామబలోపేతాం రక్షాం యః సుకృతీ పఠేత్
సచిరాయుః సుఖీ పుత్రీ విజయీ వినయీ భవేత్

పాతాళ భూతల వ్యోమ చారిణశ్-చద్మ చారిణః
న ద్రష్టుమపి శక్తాస్తే రక్షితం రామనామభిః

రామేతి రామభద్రేతి రామచంద్రేతి వాస్మరన్
నరో నలిప్యతే పాపైర్భుక్తిం ముక్తిం చ విందతి

జగజ్జైత్రైక మంత్రేణ రామనామ్నాభి రక్షితమ్
యః కంఠే ధారయేత్తస్య కరస్థాః సర్వ సిద్ధయః

వజ్రపంజర నామేదం యో రామకవచం స్మరేత్
అవ్యాహతాఙ్ఞః సర్వత్ర లభతే జయ మంగళమ్

ఆదిష్టవాన్ యథాస్వప్నే రామ రక్షా మిమాం హరః
తథా లిఖితవాన్ ప్రాతః ప్రబుద్ధౌ బుధకౌశికః

ఆరామః కల్పవృక్షాణాం విరామః సకలాపదామ్
అభిరామ స్త్రిలోకానాం రామః శ్రీమాన్సనః ప్రభుః

తరుణౌ రూపసంపన్నౌ సుకుమారౌ మహాబలౌ
పుండరీక విశాలాక్షౌ చీరకృష్ణా జినాంబరౌ

ఫలమూలాసినౌ దాంతౌ తాపసౌ బ్రహ్మచారిణౌ
పుత్రౌ దశరథస్యైతౌ భ్రాతరౌ రామలక్ష్మణౌ

శరణ్యౌ సర్వసత్వానాం శ్రేష్టా సర్వ ధనుష్మతాం
రక్షఃకుల నిహంతారౌ త్రాయేతాం నో రఘూత్తమౌ

ఆత్త సజ్య ధనుషా విషుస్పృశా వక్షయాశుగ నిషంగ సంగినౌ
రక్షణాయ మమ రామలక్షణావగ్రతః పథిసదైవ గచ్ఛతాం

సన్నద్ధః కవచీ ఖడ్గీ చాపబాణధరో యువా
గచ్ఛన్ మనోరథాన్నశ్చ రామః పాతు స లక్ష్మణః

రామో దాశరథి శ్శూరో లక్ష్మణానుచరో బలీ
కాకుత్సః పురుషః పూర్ణః కౌసల్యేయో రఘూత్తమః

వేదాంత వేద్యో యఙ్ఞేశః పురాణ పురుషోత్తమః
జానకీవల్లభః శ్రీమానప్రమేయ పరాక్రమః

ఇత్యేతాని జపేన్నిత్యం మద్భక్తః శ్రద్ధయాన్వితః
అశ్వమేథాధికం పుణ్యం సంప్రాప్నోతి నసంశయః

రామం దూర్వాదళ శ్యామం పద్మాక్షం పీతావాససం
స్తువంతి నాభిర్-దివ్యైర్-నతే సంసారిణో నరాః

రామం లక్ష్మణ పూర్వజం రఘువరం సీతాపతిం సుందరం
కాకుత్సం కరుణార్ణవం గుణనిధిం విప్రప్రియం ధార్మికం

రాజేంద్రం సత్యసంధం దశరథతనయం శ్యామలం శాంతమూర్తిం
వందేలోకాభిరామం రఘుకుల తిలకం రాఘవం రావణారిమ్

రామాయ రామభద్రాయ రామచంద్రాయ వేథసే
రఘునాథాయ నాథాయ సీతాయాః పతయే నమః

శ్రీరామ రామ రఘునందన రామ రామ
శ్రీరామ రామ భరతాగ్రజ రామ రామ
శ్రీరామ రామ రణకర్కశ రామ రామ
శ్రీరామ రామ శరణం భవ రామ రామ

శ్రీరామ చంద్ర చరణౌ మనసా స్మరామి
శ్రీరామ చంద్ర చరణౌ వచసా గృహ్ణామి
శ్రీరామ చంద్ర చరణౌ శిరసా నమామి
శ్రీరామ చంద్ర చరణౌ శరణం ప్రపద్యే

మాతారామో మత్-పితా రామచంద్రః
స్వామీ రామో మత్-సఖా రామచంద్రః
సర్వస్వం మే రామచంద్రో దయాళుః
నాన్యం జానే నైవ న జానే

దక్షిణేలక్ష్మణో యస్య వామే చ జనకాత్మజా
పురతోమారుతిర్-యస్య తం వందే రఘువందనమ్

లోకాభిరామం రణరంగధీరం
రాజీవనేత్రం రఘువంశనాథం
కారుణ్యరూపం కరుణాకరం తం
శ్రీరామచంద్రం శరణ్యం ప్రపద్యే

మనోజవం మారుత తుల్య వేగం
జితేంద్రియం బుద్ధిమతాం వరిష్టం
వాతాత్మజం వానరయూధ ముఖ్యం
శ్రీరామదూతం శరణం ప్రపద్యే

కూజంతం రామరామేతి మధురం మధురాక్షరం
ఆరుహ్యకవితా శాఖాం వందే వాల్మీకి కోకిలమ్

ఆపదామపహర్తారం దాతారం సర్వసంపదాం
లోకాభిరామం శ్రీరామం భూయోభూయో నమామ్యహం

భర్జనం భవబీజానామర్జనం సుఖసంపదాం
తర్జనం యమదూతానాం రామ రామేతి గర్జనమ్

రామో రాజమణిః సదా విజయతే రామం రమేశం భజే
రామేణాభిహతా నిశాచరచమూ రామాయ తస్మై నమః
రామాన్నాస్తి పరాయణం పరతరం రామస్య దాసోస్మ్యహం
రామే చిత్తలయః సదా భవతు మే భో రామ మాముద్ధర

శ్రీరామ రామ రామేతి రమే రామే మనోరమే
సహస్రనామ తత్తుల్యం రామ నామ వరాననే

ఇతి శ్రీబుధకౌశికముని విరచితం శ్రీరామ రక్షాస్తోత్రం సంపూర్ణం