Agastya Krita Shivashtakam

అద్య మే సఫలం జన్మ చాద్య మే సఫలం తపః ।
అద్య మే సఫలం జ్ఞానం శమ్భో త్వత్పాదదర్శనాత్ ॥ ౧॥

కృతార్థోహం కృతార్థోహం కృతార్థోహం మహేశ్వర ।
అద్య తే పాదపద్మస్య దర్శనాత్భక్తవత్సల ॥ ౨॥

శివశ్శమ్భుః శివశ్శంభుః శివశ్శంభుః శివశ్శివః ।
ఇతి వ్యాహరతో నిత్యం దినాన్యాయాన్తు యాన్తు మే ॥ ౩॥

శివే భక్తిశ్శివే భక్తిశ్శివే భక్తిర్భవేభవే ।
సదా భూయాత్ సదా భూయాత్సదా  భూయాత్సునిశ్చలా ॥ ౪॥

ఆజన్మ మరణం యస్య మహాదేవాన్యదైవతమ్ ।
మాజనిష్యత మద్వంశే జాతో వా ద్రాగ్విపద్యతామ్ ॥ ౫॥

జాతస్య జాయమానస్య గర్భస్థస్యాపి దేహినః ।
మాభూన్మమ కులే జన్మ యస్య శమ్భుర్న-దైవతమ్ ॥ ౬॥

వయం ధన్యా వయం ధన్యా వయం ధన్యా జగత్త్రయే ।
ఆదిదేవో మహాదేవో యదస్మత్కులదైవతమ్ ॥ ౭॥

హర శంభో మహాదేవ విశ్వేశామరవల్లభ ।
శివశఙ్కర సర్వాత్మన్నీలకణ్ఠ నమోస్తు తే ॥ ౮॥

అగస్త్యాష్టకమేతత్తు యః పఠేచ్ఛివసన్నిధౌ ।
శివలోకమవాప్నోతి శివేన సహ మోదతే ॥ ౯॥



॥ ఇత్యగస్త్యాష్టకమ్ ॥