లక్ష్మీనృసింహపఞ్చరత్నమ్
త్వత్ప్రభుజీవప్రియమిచ్ఛసి చేన్నరహరిపూజాం కురు సతతం
ప్రతిబిమ్బాలంకృతిధృతికుశలో బిమ్బాలంకృతిమాతనుతే |
చేతోభృఙ్గ భ్రమసి వృథా భవమరుభూమౌ విరసాయాం
భజ భజ లక్ష్మీనరసింహానఘపదసరసిజమకరన్దమ్ || ౧||
శుక్త్తౌ రజతప్రతిభా జాతా కతకాద్యర్థసమర్థా చే
ద్దుఃఖమయీ తే సంసృతిరేషా నిర్వృతిదానే నిపుణా స్యాత్ |
చేతోభృఙ్గ భ్రమసి వృథా భవమరుభూమౌ విరసాయాం
భజ భజ లక్ష్మీనరసింహానఘపదసరసిజమకరన్దమ్ || ౨||
ఆకృతిసామ్యాచ్ఛాల్మలికుసుమే స్థలనలినత్వభ్రమమకరోః
గన్ధరసావిహ కిము విద్యేతే విఫలం భ్రామ్యసి భృశవిరసేస్మిన్ |
చేతోభృఙ్గ భ్రమసి వృథా భవమరుభూమౌ విరసాయాం
భజ భజ లక్ష్మీనరసింహానఘపదసరసిజమకరన్దమ్ || ౩||
స్రక్చన్దనవనితాదీన్విషయాన్సుఖదాన్మత్వా తత్ర విహరసే
గన్ధఫలీసదృశా నను తేమీ భోగానన్తరదుఃఖకృతః స్యుః |
చేతోభృఙ్గ భ్రమసి వృథా భవమరుభూమౌ విరసాయాం
భజ భజ లక్ష్మీనరసింహానఘపదసరసిజమకరన్దమ్ || ౪||
తవ హితమేకం వచనం వక్ష్యే శృణు సుఖకామో యది సతతం
స్వప్నే దృష్టం సకలం హి మృషా జాగ్రతి చ స్మర తద్వదితి|
చేతోభృఙ్గ భ్రమసి వృథా భవమరుభూమౌ విరసాయాం
భజ భజ లక్ష్మీనరసింహానఘపదసరసిజమకరన్దమ్ || ౫||
ఇతి శ్రీమత్పరమహంసపరివ్రాజకాచార్యస్య శ్రీ గోవిన్ద భగవత్పూజ్యపాద శిష్యస్య
శ్రీమచ్ఛంకర భగవతః కృతౌ లక్ష్మీనృసింహ పJణ్చరత్నమ్ సమ్పూర్ణమ్ ||
Saturday, April 28, 2012
Subscribe to:
Post Comments (Atom)
0 comments:
Post a Comment